सर्लाही : सर्लाहीको लालबन्दीमा कक्षा १२ मा पढ्दै गरेकी १६ वर्षीया एक किशोरीको शव फेला परेको छ।
लालबन्दी- १६ परवानीपुर निवासी ज्ञानबहादुर थापाकी १६ वर्षीया छोरी अन्जली शुक्रबार बिहान आफ्नै कोठामा मृत भेटिएकी हुन्। उनले आत्महत्या गरेको आशंका गरिएको छ।
‘उनी आफ्नै कोठामा सलको पासोमा झुन्डिएको खबर आएपछि हामी घटनास्थलमा पुगेका थियौँ,’ इलाका प्रहरी कार्यालय लालबन्दीका प्रहरी निरीक्षक (इन्सपेक्टर) हरिवोल केसीले भने, ‘शव अहिले हाम्रो कार्यालयमा ल्याइएको छ। अब पोष्टमार्टमको लागि प्रादेशिक अस्पताल मलंगवा पठाउँछौँ।’
प्रहरीका अनुसार किशोरीकी आमाले छोरीलाई पासोमा देखेपछि त्यसलाई खोलेकी थिइन्। ‘त्यसपछि हामीलाई खबर भएको हो,’ केसीले भने, ‘हामीले घटनाको थप अनुसन्धान सुरु गरेका छौँ।’
अन्जली लालबन्दीस्थित जनज्योती माविकी विद्यार्थी हुन्। उनले कक्षा १२ मा पढ्दै आएकी थिइन्। उनले आत्महत्या गर्नुको कारण भने नखुलेको प्रहरीले जनाएको छ।
