सरकारले पूर्वप्रधानमन्त्री पुष्पकमल दाहाल ‘प्रचण्ड’ लगायतका नेताहरूको सुरक्षाकर्मी फिर्ता गर्ने निर्णय गरेपछि माओवादी नेताहरूले कडा प्रतिक्रिया जनाएका छन्। विशेषगरी माओवादी केन्द्रका नेता तथा वाईसीएल इन्चार्ज रामप्रसाद सापकोटा ‘दीपशिखा’ ले सामाजिक सञ्जालमार्फत पूर्वप्रधानन्यायाधीश सुशीला कार्कीलाई लक्षित गर्दै चेतावनी दिएका छन्।
दीपशिखाले लेखेका छन्, “क. प्रचण्ड लगायत माओवादी नेताहरूको सुरक्षा वाईसीएल र पूर्व पीएलएले गर्छ र गरिरहेको छ। बुझ्नुपर्छ — ढिलोचाँडो बदलाभावको सत्ता डण्डा केपी ओलीको जस्तै हुने छ।” उनको यो अभिव्यक्ति सरकार र न्यायिक वृत्तप्रति असन्तुष्टिको प्रत्यक्ष संकेत मानिएको छ।
गृह मन्त्रालयले बिहीबार मात्रै स्वीकृत मापदण्डभन्दा बढी सुरक्षाकर्मी राखेका पूर्वपदाधिकारीहरूको सुरक्षा फिर्ता गर्ने निर्णय गरेको थियो। सो निर्णय सार्वजनिक भएपछि माओवादी पक्षले यसलाई राजनीतिक बदला र पूर्वाग्रहपूर्ण कदम भन्दै आपत्ति जनाएका छन्।
दीपशिखाले आफ्नो पोस्टमार्फत स्पष्ट पारेका छन् कि, माओवादी नेताहरूको सुरक्षा अब वाईसीएल र पूर्व जनमुक्ति सेनाले नै गर्नेछन्। उनले चेतावनीस्वरूप भनेका छन् — “हामी जनताको सुरक्षाको पक्षमा छौँ, तर बदला लिने मानसिकताले शासन चलाउनेहरूको अन्त्य नजिक छ।”
माओवादी पक्षका नेताहरूले सरकारको यो कदमले शान्ति प्रक्रियामा बनेको संवेदनशील सन्तुलनलाई कमजोर पार्ने बताएका छन् भने गृह मन्त्रालयले यो निर्णय मापदण्डअनुसार र प्रशासनिक कारणले गरिएको जनाएको छ।
