काठमाडौं, मंसिर २७ । नेपालमा कार्यकाल सकेर फर्कन लागेका भारतीय राजदूत नविन श्रीवास्तव आज शनिबार अचानक अचेत भएपछि भेन्टिलेटरमा राखिएको छ।
छुट्टीको दिन हाइकिङका लागि निस्किएका राजदूत श्रीवास्तवलाई काठमाण्डौ जिल्ला दक्षिणकाली नगरपालिका वडा नम्बर ९ भस्मेसुर डाँडाको जंगलमा अचानक छाती दुखेपछि ढलेको जनाइएको छ।
दिउँसो करिब अढाइ बजे दूतावासका दुई जना अधिकारीसहित हाइकिङमा गएका बेला उनी अकस्मात लडेपछि नेपाली सेना र प्रहरीले संयुक्त रुपमा उद्दार गरेका थिए।
श्री युद्ध कवच गणबाट क्याप्टेन रत्नदिपसिंह ठकुरीको कमाण्डमा ९ जना सैनिक र सशस्त्र प्रहरी बल दंगा नियन्त्रण रेजिमेन्ट गण नीलबाराही, कीर्तिपुरबाट इन्स्पेक्टर लोकबहादुर तामाङको नेतृत्वमा १७ जनाको टोलीले उद्दार कार्य सम्पन्न गरेको थियो।
उद्धारपछि सेनाको हेलिकप्टरमार्फत साँझ ४ बजेर ३० मिनेटमा उनलाई ग्राण्डी अस्पताल पुर्याइएको थियो। हाल उनी भेन्टिलेटरमा राखी उपचार भइरहेको अस्पताल स्रोतले जनाएको छ।
