काठमाडौँ । सर्वोच्च अदालतका वरिष्ठतम् न्यायाधीश सपना प्रधान मल्लले कुनै पनि मुद्दामा कसुरको अनुसन्धान भए पनि क्षतिको अनुसन्धान नहुने अवस्था रहेको भन्दै त्यसतर्फ ध्यान दिन आग्रह गरेकी छन्।
महान्यायाधिवक्ता कार्यालयको ७५औँ स्थापना दिवसका अवसरमा मंगलबार आयोजित कार्यक्रममा बोल्दै न्यायाधीश प्रधानले कसुरमा मात्रै अनुसन्धान हुँदा अदालतले दोषी ठहर गरे पनि क्षतिको विषयमा बोल्न सक्ने अवस्था नहुने बताइन्।
उनले न्यायिक आचरणका बैंगलोर सिद्धान्तहरू न्यायाधीशहरूका लागि विश्वव्यापी नैतिक मापदण्ड भएको उल्लेख गर्दै ती सिद्धान्तले स्वतन्त्रता, निष्पक्षता, निष्ठा, औचित्य, समानता तथा क्षमता र लगनशीलता गरी छ वटा मुख्य मूल्यलाई मार्गदर्शन गर्ने बताइन्।
भदौ २४ गते भएको आगजनीमा अदालत, सरकारी वकिल कार्यालय, प्रहरी भवनलगायत संरचना जलेको स्मरण गर्दै न्यायाधीश मल्लले अदालत पुनःस्थापना मात्र पर्याप्त नभई सुधार पनि आवश्यक रहेकोमा जोड दिइन्। ‘सर्वोच्च अदालतको फुलकोर्ट बैठकबाट सुधारको एजेन्डा अगाडि बढाउँदैछौँ,’ उनले भनिन्।
पछिल्लो समय डिजिटल अपराध बढ्दै गएकाले त्यसको अनुसन्धान र अभियोजनका लागि विशिष्टीकृत इन्टेलिजेन्स आवश्यक रहेको उनको भनाइ छ। नयाँ प्रविधिको विकाससँगै डिजिटल अपराध बढेकाले यस्ता अपराधको अनुसन्धान छुट्टै तरिकाले गर्नुपर्ने उनले बताइन्।
