काठमाडौँ । नेपाली कांग्रेसका सभापति शेरबहादुर देउवाले बिहीबार महामन्त्रीद्वय गगन थापा र विश्वप्रकाश शर्मालाई भेट्न समय दिएनन् । अपराह्न ५ बजेका लागि भेट्ने समय दिए पनि अन्तिममा आफूले नभ्याएको भन्दै शुक्रबार भेट्ने जानकारी देउवाले महामन्त्रीद्वयलाई गराएका थिए । उनीहरूसँगै कार्यवाहक सभापति पूर्णबहादुर खड्कालाई पनि राखेर भेट्ने तयारी थियो, अन्तिममा एकाएक स्थगित गरियो ।
पार्टी केन्द्रीय कार्यालयका मुख्यसचिव कृष्णप्रसाद पौडेलले बिहीबार सभापति देउवाले नभ्याएकाले भेटघाट नभएको जानकारी दिए । उनले शुक्रबार सभापतिको अनुकूल समयमा महामन्त्रीद्वयलाई आफू वा भानु देउवा (देउवाका स्वकीय सचिव) ले बोलाउने जानकारी गराइएको जानकारी दिए ।
‘आज भेट्ने भन्ने कुरा थियो । तर, सभापति अन्य काममा व्यस्त हुनुपर्ने भएकाले भ्याउनुभएन,’ मुख्यसचिव पौडेलले भने, ‘भोलि सभापतिज्यूको अनुकूल समयमा महामन्त्रीद्वयलाई आफू वा भानु देउवा (देउवाका स्वकीय सचिव) ले बोलाउने जानकारी गराइएको छ ।’
महामन्त्रीद्वय थापा र शर्माको निर्देशनमा पुस २७ र २८ गतेका लागि भृकुटीमण्डपस्थित हल गरिएको छ ।
