काठमाडौँ । पश्चिम एसियामा जारी तनाव थप चुलिँदै गएको छ । अमेरिकी नौसैनिक बलले स्टेट अफ होर्मुज नजिकै इरानको झण्डा बोकेको एक जहाज कब्जा गरेको खबर सार्वजनिक भएपछि इरानले अमेरिका विरुद्ध आवश्यक कदम चाल्ने चेतावनी दिएको छ ।
इरानको सरकारी सञ्चारमाध्यमअनुसार इरानले यस घटनालाई खुला आक्रमण का रूपमा लिइरहेको छ । इस्लामिक रिभोलुशनरी गार्ड कप्र्स (आईआरजीसी)सँग सम्बन्धित तास्निम न्यूज एजेन्सीले इरानी सेना निर्णायक जवाफ दिन तयार रहेको जनाएको छ ।
जहाजमा चालकदलका परिवारका सदस्यहरू समेत रहेका कारण तत्काल प्रतिकार गर्न केही सीमितता रहेको सोही समाचारमा बताइएको छ । यसले चालकदलका सदस्य र तिनका परिवारका सदस्यहरूको सुरक्षालाई प्राथमिकता दिइएको सङ्केत गरिएको छ ।
“हालको परिस्थितिमा जहाजमा रहेका परिवार र चालकदलको सुरक्षा सुनिश्चित भएपछि इस्लामिक गणतन्त्र इरानका शक्तिशाली सशस्त्र बलले अमेरिकी सेनाविरुद्ध आवश्यक कदम चाल्नेछन्,” तस्निमले उल्लेख गरेको छ ।
यो घटनाले पहिले नै संवेदनशील अवस्थामा रहेको क्षेत्रमा तनाव थपिएको छ । आइतबार अमेरिकी नौसैनिक बलले इरानी कार्गाे जहाजलाई नियन्त्रणमा लिएको थियो ।
जहाजले अमेरिकी नाकाबन्दी तोड्दै जलडमरूमध्य पार गर्ने प्रयास गरिरहेको बताइएको थियो । यस घटनापछि इरान यसै साता तय भएको युद्धविरामसम्बन्धी दोस्रो चरणको वार्ताबाट पछि हटेको छ।
