नयाँ दिल्ली । इन्स्टाग्राममा फलोअर्सको संख्यामा भारतको सत्तारुढ दल भारतीय जनता पार्टी (भाजपा) लाई पछि पारेको केही घण्टामै ‘कक्रोच जनता पार्टी’ (सीजेपी) को एक्स अकाउन्ट भारतमा रोक्का गरिएको छ ।
सीजेपीका संस्थापक अभिजीत दीपकेले एक्समा एक पोस्ट सेयर गर्दै लेखेका छन्, ‘अपेक्षा गरिएझैँ, कक्रोच जनता पार्टीको अकाउन्ट भारतमा रोक्का गरिएको छ ।’ सीजेपीको उक्त एक्स अकाउन्टमा २ लाखभन्दा बढी फलोअर्स थिए र यसलाई अरुन्धती रोय, प्रशान्त भूषण, ध्रुव राठी र कुणाल कामराजस्ता चर्चित व्यक्तित्वहरूले फलो गरेका थिए ।
सीजेपी एक व्यङ्ग्यात्मक राजनीतिक अनलाइन अभियान हो, जुन गत हप्ता मात्र सुरु भएको थियो । भारतमा यसको एक्स अकाउन्ट रोक्का हुनुअघिसम्म यसमा ६ लाखभन्दा बढी प्रयोगकर्ताहरू दर्ता भइसकेका थिए र यसले इन्टरनेटमा निकै चर्चा कमाएको थियो । यद्यपि, यो समाचार तयार पार्दासम्म यसको इन्स्टाग्राम अकाउन्ट भने सक्रिय नै छ, जसमा १ करोड २० लाखभन्दा बढी फलोअर्स रहेका छन् ।
इन्स्टाग्राममा भाजपालाई उछिन्यो
सीजेपीले आधिकारिक रूपमा भाजपालाई इन्स्टाग्राम फलोअर्सको संख्यामा पछि पारेको छ । स्थापना भएको मात्र चार दिनभित्र यसले १ करोड २० लाखभन्दा बढी फलोअर्स बटुल्न सफल भएको थियो । बिहीबारसम्म यस ह्यान्डलमा १ करोड ३० लाख (१३ मिलियन) फलोअर्स पुगेका छन्, जुन भाजपाको ८७ लाख (८.७ मिलियन) भन्दा बढी हो । भाजपाले १८ हजारभन्दा बढी पोस्टहरू गरेर आफ्नो अकाउन्ट सञ्चालन गरिरहेको अवस्थामा सीजेपीले भने मात्र ५६ वटा पोस्टमै यो संख्या हासिल गरेको हो ।
