नेकपा (माओवादी केन्द्र) को शुक्रबार सम्मप्न केन्द्रीय समितिको सातौँ बैठकमा अध्यक्ष पुष्पकमल दाहाल ‘प्रचण्ड’ उनकी छोरी गंगा दाहालको विलाशी जीवनबारे प्रश्न उठाइएको छ।
केन्द्रीय सदस्य लक्ष्मण पन्तले बैठकमा बोल्ने क्रममा प्रचण्डको महँगो घडी र गंगाको विलाशी ब्यागसहित राजर्षि जीवनबारे प्रश्न उठाएका हुन् ।
सार्क इन्चार्जसमेत रहेका उनले अध्यक्ष प्रचण्डको ६४ लाखको रोलेक्स घडी र गंगाको २८ लाखको लुउ भाइटन ब्यागको आम्दानीको स्रोतबारे प्रश्न गरेका हुन् ।
पन्तले बैठकमा अब पहिले पार्टीमै भ्रष्टाचारविरुद्धको संघर्ष चाहिएको बताएका छन् । उनले यसरी प्रचण्ड र गंगाबारे कुरा उठाउने कांग्रेस नेता एवम् नोबेल अस्पतालका मालिक सुनील शर्मालाई कारबाही गर्न पनि आग्रह गरे । झूटो भए शर्माविरुद्ध मुद्दा चलाउनुपर्ने उनले बतए ।
उनले प्रचण्ड र गंगालाई यदि ती सामान उपहारमा आएका भए पनि पार्टी कोषमा जम्मा हुनुपर्ने बताए । हाल जेलमा रहेकमा पाकिस्तानी पूर्वप्रधानमन्त्री इमरान खानले सरकारमा हुँदा महँगा उपहार बेचेर निजी फाइदामा उपयोग गरेको कुरा पनि प्रचण्डलाई उनले सम्झाए।
उनले पार्टीका नेताहरूको सम्पत्ति छानबिन गर्नुपर्ने पनि माग गरेका छन् ।
त्यसैगरी प्रचण्डनिकट भनिएका व्यवसायी अजय सुमार्गीको ‘हेलो नेपाल’ बाट देशलाई २० घाटा भएको जिकिर पनि गरे । उता उनले माओवादी लडाकुको २ अर्ब ८२ करोडको हिसाब पनि खोजे । उनले निरन्तर सरकारमा गएका नेताहरूको सम्पत्ति पनि खोज्नुपर्ने बताए ।
पन्तले प्रचण्ड र गंगाको जीवनशैलीको वैधानिकता र स्रोत स्पष्ट गर्न माग गर्दै छानबिन तथा आवश्यक परे मुद्दा हाल्न पनि चुनौती दिए ।
