काठमाडौँ — २३ र २४ भदौमा भएको आन्दोलनका क्रममा गोली प्रहारबाट मारिएका ३९ जनाको पोस्टमार्टम रिपोर्टले सबैजसोलाई कम्मरभन्दा माथि गोली लागेको पुष्टि गरेको छ।
त्रिवि शिक्षण अस्पतालको फरेन्सिक विभागले तयार पारेको प्रतिवेदनमा अधिकांशको छाती, टाउको, घाँटी र पेटमा गोली लागेको उल्लेख छ। रिपोर्ट अनुसार ‘हाई भेलोसिटी’ अर्थात् राइफलजस्ता घातक हतियार प्रयोग भएको पाइएको छ।
फरेन्सिक विभागका प्रमुख डा. गोपाल चौधरीका अनुसार केही शवमा मात्र लो–भेलोसिटी पेस्तोलका गोलीको प्रभाव देखिए पनि अधिकांश मृतक टाढाबाट चलेको मेटल बुलेटको कारण मारिएका हुन्। काठमाडौं उपत्यकामा मात्रै ३५ जनाको मृत्यु भएकोमा १९ जनाको छाती, १० जनाको टाउको, चार जनाको पेट र दुई जनाको घाँटीमा गोली लागेको पाइएको छ।
मानवअधिकार आयोगले प्रहरी र सुरक्षाकर्मीले अत्यधिक बल प्रयोग गरेको आरोपमा अनुसन्धान अघि बढाएको छ। आयोगका प्रवक्ता डा. टीकाराम पोखरेलका अनुसार पहिलो दिनको गोली प्रहारका घटना विशेष गम्भीर भएकाले प्राथमिकता दिइरहेको बताइएको छ।
विज्ञहरूले प्रहरीमा पर्याप्त तालिमको अभाव र घातक हतियारको प्रयोगले यस्तो मानवीय क्षति भएको टिप्पणी गरेका छन्।
