काठमाडौँ । नेकपा एमालेका अध्यक्ष केपी शर्मा ओलीले अहिले एमाले आफ्ना लागि नभएर देशका लागि लडिरहेको बताएका छन् । आइतबार ११ औँ राष्ट्रिय महाधिवेशनको लोगो सार्वजनिक गर्दै उनले एमालेले राष्ट्रिय आकाङ्क्षालाई साकार पार्ने अभियानमा एमाले लागेको बताएका हुन् ।
‘राष्ट्रिय आकांक्षा सारकार पार्ने अभियान एमालेको मात्रै होइन’, ओलीले सम्पूर्ण बौद्धिक वर्गलाई सम्बोधन गर्दै भने– ‘देशका विरुद्ध तर्क कुतर्क गर्नु बौद्धिकता होइन ।’
प्रगति, शान्तिका विरुद्ध आगजनी र तोडफोड गरेर महिमा मण्डन नगर्न ओलीको आग्रह छ । उनले एमाले जहिले पनि सत्यको पक्षमा उभिने भन्दै वर्तमान सरकार असंवैधानिक छ भन्ने कुरा एमाले बाहेकले भन्न डराएको दाबी गरे । बौद्धिकताको दुरुपयोग गर्ने दिवालियापन नदेखाउन ओलीको आग्रह छ ।
‘बौद्धिक समुदायले देशको पक्षमा, सत्यका लागि शुकरातले विष पिएका थिए तर हामीले विष पिउनुपर्दैन, बोलिदिए हुन्छ’, ओलीले भने, ‘भाषा, शब्द अलिकति मिलाउने हो सत्यतर्फ ।’ उनले नेकपा एमाले झुट नबोल्ने र असत्य नअँगाल्ने तथा देशका विरुद्ध नजाने भएकाले एमालेलाई साथ दिन आग्रह गरे ।
‘एमालेलाई त्रसित बनाउन सक्ने, डरपोक बनाउन सक्ने वा लोभी बनाउन सक्ने केही पनि छैन’, उनले राजनीतिक दल र सङ्घ संस्थाहरूलाई सङ्कीर्णता र बेतुकका तर्क गर्न छाड्न आग्रह गरे । देश अप्ठ्यारो अवस्थामा रहेको भन्दै उनले असंवैधानिक ढङ्गबाट भएको संसद् विघटन पुनर्स्थापना हुनुपर्ने बताए । ‘संसद् पुनर्स्थापना भयो भने बरबाद हुन्छ रे ! त्यही बरबाद हुन्छ भनेर विघटन गरेको ?’, प्रश्न गर्दै ओलीले भने, ‘लोकतन्त्र र संसदीय व्यवस्था आउन नदिने, अनि बुख्याचाहरू सब्जी बारीमा त ठिकै हो, सिंहदरबारमा बुख्याचा ?’
उनले बुख्याचा कहिल्यै निर्वाचित नहुने भन्दै सिंहदरबार जननिर्वाचित प्रतिनिधि बस्ने ठाउँ भएको बताए ।
