पोखरा । नेपाली कांग्रेस मनाङले आगामी फागुन २१ गते हुने प्रतिनिधि सभा सदस्य निर्वाचनका लागि एकल उम्मेदवार सिफारिस गरेको छ ।
निवर्तमान सांसद तथा पूर्वमन्त्री टेकबहादुर गुरुङको नाम एकल रूपमा सिफारिस गरिएको जिल्ला सचिव सुरेन्द्र गुरुङले जानकारी दिए ।
‘सहमतिमै नाम टुङ्गो लागेको छ । मनाङबाट एक जनाको मात्रै नाम सिफारिस भएको छ,’ उनले भने । गुरुङ पहिलो पटक २०७० को दोस्रो संविधानसभामा निर्वाचित भएका थिए ।
सोही समयमा श्रम तथा रोजगार राज्यमन्त्री बनेका उनी २०७४ मा एमालेसँग पराजित भए । २०७९ को निर्वाचनमा उनी पुनः निर्वाचित भएका हुन् ।
उनी यसअघि भृकुटीमण्डपको जग्गामा भ्रष्टाचार आरोपमा दोषी ठहरिएका छन् । उनलाई अदालतले जरिवाना लिएर छोड्ने आदेश गरेको थियो ।
