पोखरा । नेपाली कांग्रेसले फागुन २१ गते हुने निर्वाचनका लागि उम्मेदवार सिफारिस गरिरहेको छ ।
नवलपुरमा उम्मेदवारको सिफारिसमै बदमासी भएको भन्दै प्रदेशको क्षेत्रीय सभापति सहित १९ जनाले सामूहिक राजीनामा दिएका छन् । आम नेता कार्यकर्ताको भावनाविपरीत नाम सिफारिस गरिएको भन्दै क्षेत्र नम्बर १ (१) का सभापति गोपालप्रसाद सापकोटा, क्षेत्र नम्बर १ का सचिव शालिकराम सापकोटा, सहसचिव टीकाराम सापकोटा र तेजप्रसाद घिमिरेसहित कार्यसमितिका १९ जनाले राजीनामा दिएका हुन् ।
उनीहरूले क्षेत्रीय सभापति अमृत भट्टचनलाई राजीनामा बुझाएका हुन् । छनोट प्रक्रियामा विधि र पद्धति मिचिएको तथा तल्लो तहबाट सिफारिस भएका नाममा ‘टिपेक्स’ लगाएर परिवर्तन गरिएको भन्दै उनीहरू असन्तुष्ट बनेका हुन् ।
‘सिफारिस गर्ने क्रममा वडा र नगर कार्यसमितिबाट माग गर्ने र स्थानीय लोकप्रिय व्यक्तित्वलाई अघि सार्ने हाम्रो चाहना थियो,’ सचिव शालिकराम सापकोटाले भने, ‘तर माथिबाटै लादेर, केन्द्रको दबाबमा सिफारिस गरिएका नाममा टिपेक्स लगाएर अर्को नाम पठाइयो । यसप्रति हाम्रो घोर असहमति छ ।’
तत्कालका लागि पदबाट मात्रै राजीनामा दिएको र अझै सुधार नभए पार्टीबाटै बाहिरिने उनको चेतावनी छ । ‘विधि मिचेर जनभावनाविपरीत पुराना र वरिपरिका मान्छेलाई मात्र अवसर दिने प्रवृत्तिले पार्टी कमजोर बन्दै गएको छ,’ उनले थपे ।
राजीनामा दिनेहरूमा क्षेत्रीय कार्यसमितिका ७ जना पदाधिकारीमध्ये ४ जना छन् । यस्तै अन्य कार्यसमिति सदस्यहरू र तरुण दल क्षेत्र नम्बर १ (१) का सभापति राजु पौडेलले पनि राजीनामा दिएका छन् ।
