काठमाडौँ । नेकपा एमालेको ११औँ महाधिवेशनअन्तर्गत नयाँ नेतृत्व चयनका लागि मतदानमा बुधवार पनि विलम्ब भएको छ । बिहान ८ बजेदेखि मतदान हुने बताइए पनि ९ बजेसम्म पनि मतदान सुरु हुन नसकेको हो ।
अध्यक्ष केपी शर्मा ओली मतदानस्थल आएलगत्तै मतदान सुरु हुने बताइएको छ । यद्यपि बिहान ९ बजेसम्म ओली भृकुटीमण्डप पुगेका छैनन् ।
नेता कार्यकर्ता भने मतदानको लागि लाइन लागेका छन् । अध्यक्षका अर्का उम्मेदवार ईश्वर पोखरेल भने मतदान स्थल पुगिसकेका छन् ।
मंगलबार साँझ हुने भनिएको मतदान केही प्राविधिक समस्याका कारण भन्दै आज बिहानलाई सारिएको थियो ।
