काठमाडौं । राष्ट्रिय स्वतन्त्र पार्टी (रास्वपा)ले इलाम क्षेत्र नम्बर २ को उपनिर्वाचनका प्रत्यासी मिलन लिम्बूलाई समानुपातिकतर्फको प्रारम्भिक उम्मेदवार सिफारिस गरेको छ ।
इलामका स्थायी बासिन्दा लिम्बुलाई रास्वपाले कोशी प्रदेशअन्तर्गत आदिवासी जनजाति क्लस्टरबाट प्रारम्भिक समानुपातिक उम्मेदवारको रूपमा सिफारिस गरेको हो । रास्वपाले कोशी प्रदेशबाट प्रारम्भिक समानुपातिक उम्मेदवारका लागि ६० जनाको नाम सिफारिस गरेको छ ।
प्रारम्भिक उम्मेदवार सूचीमा समावेश उम्मेदवारसँग शनिबार रास्वपा कोशी प्रदेश कार्यालय इटहरीमा छलफल हुने जनाइएको छ ।
इलाम क्षेत्र नम्बर २ बाट निर्वाचित एमाले नेता सुवास नेम्बाङको निधन भएपछि २०८१ वैशाख १५ गते भएको उपनिर्वाचनमा रास्वपाको तर्फबाट लिम्बू उम्मेदवार बनेका थिए, तर उनी पराजित भए । उक्त क्षेत्रबाट २७ हजार ७७२ मत प्राप्त गर्दै एमालेका सुहाङ नेम्बाङ विजयी भएका थिए । निकटतम् प्रतिद्वन्द्वी कांग्रेसका खड्काले २१ हजार ९४२ मत प्राप्त गरेका थिए । तेस्रो स्थानमा रहेका पहिचानवादी स्वतन्त्र उम्मेदवार डकेन्द्रसिंह थेगिमले ११ हजार ४५७ मत पाएका थिए भने रास्वपाका लिम्बू ५ हजार ५० मत प्राप्त गरी चौथो स्थानमा रहेका थिए ।
