काठमाडौँ । राष्ट्रिय स्वतन्त्र पार्टी (रास्वपा) र उज्यालो नेपाल पार्टीबिच एकता गर्नेगरी पुनः संवाद भएको छ । रास्वपाका सभापति रवि लामिछाने, काठमाडौँ महानरपालिका मेयर बालेन शाह (बालेन्द्र ) र उज्यालो नेपाल पार्टीका संरक्षक कुलमान घिसिङबिच काठमाडौँमा वार्ता भइरहेको स्रोतले जानकारी दिएको छ।
तीन नेता करिब तीन घण्टादेखि निरन्तर छलफलमा रहेको स्रोतले जनाएको छ। दुई पार्टीबिच शक्ति बाँडफाँडमा सहमतिको ड्राफ्ट भइरहेको स्रोतको दाबी छ।
एकीकृत पार्टीको सङ्गठनात्मक संरचनामा दुवै पक्षको समान सहभागिता रहनेगरी भागबन्डा मिलाइने तयारी छ । पार्टीको नाम राष्ट्रिय स्वतन्त्र पार्टी रहने र पार्टीको महामन्त्री कुलमान घिसिङ र पार्टी प्रवक्ता पनि उज्यालो नेपाललाई दिने तयारी गरिरहेको स्रोतले जनाएको छ।
छलफलमा सहभागी एक नेताका अनुसार पार्टी एकताका लागि सहमतिको मस्यौदा तयार भइरहेको र यसलाई अन्तिम रूप दिने तयारी भइरहेको छ।
