सुनसरी । नेकपा एमालेको अध्यक्ष केपी शर्मा ओलीको आलोचना गरेका एमाले निकट अनेरास्ववियुका सुनसरी जिल्ला अध्यक्ष उज्ज्वल सिग्देल बर्खास्तीमा परेका छन् ।
जेनजी आन्दोलनका क्रममा सिग्देलले नेकपा एमाले अध्यक्ष ओलीको आलोचना गरेको थिए । सिग्देल अनेरास्ववियुको २३औँ जिल्ला अधिवेशनबाट अध्यक्ष चयन भएका थिए । जेनजी आन्दोलनका क्रममा सरकारले गोली चलाउँदा विद्यार्थीको मृत्यु भएपछि उनले तत्कालीन प्रधानमन्त्री ओलीको राजीनामा माग गरेका थिए ।
ओलीले हत्याको जिम्मेवारी लिनुपर्ने र विद्यार्थीको लासमाथि चढेर प्रधानमन्त्री भएर बस्नु लाजमर्दो भएको टिप्पणी सिग्देलले गरेका थिए । जेनजी आन्दोलनलाई समर्थन गरेका उनले ओली प्रवृत्तिको विरोध गरिरहेका छन् ।
सोही आरोपमा सिग्देललाई अध्यक्षबाट हटाइएको हो । सुनसरीको धरानमा विशेष भेला गरेर शेखर रेग्मीको अध्यक्षतामा नयाँ कमिटी गठन गरिएको छ । रेग्मीले अनेरास्ववियु अधिवेशनमा अध्यक्षको दाबी गरे पनि पार्टी र बहुमत प्रतिनिधिले सिग्देललाई चुनेका थिए ।
