एजेन्सी । संयुक्त अरब इमिरेट्स (यूएई) अन्तर्गत दुबईको बन्दरगाह क्षेत्रमा कुवेतको विशाल तेल ट्यांकरमाथि ड्रोन आक्रमण भएको छ। घटनापछि अन्तर्राष्ट्रिय कच्चा तेल बजारमा तत्काल प्रभाव देखिँदै अमेरिकी सूचक वेस्ट टेक्सास इन्टरमिडियट (डब्ल्यूटीआई) को मूल्य उल्लेखनीय रूपमा बढेको छ।
कुवेतको सरकारी समाचार एजेन्सी ‘कुना’का अनुसार ‘अल–सल्मी’ नामक ट्यांकर दुबईको अङ्करेज क्षेत्रमा रहेको बेला सिधै आक्रमणको निशानामा परेको हो। उक्त जहाज ‘भेरी लार्ज क्रुड क्यारियर’ (भीएलसीसी) वर्गमा पर्ने अत्यन्त ठूलो क्षमताको ट्यांकर हो, जसले करिब ३ लाख १९ हजार टनभन्दा बढी कच्चा तेल बोक्न सक्छ।
कुवेत पेट्रोलियम कर्पोरेसन (केपीसी)ले घटनालाई गम्भीर आपराधिक आक्रमण भन्दै कडा शब्दमा निन्दा गरेको छ। कम्पनीका अनुसार ट्यांकर पूर्ण रूपमा कच्चा तेलले भरिएको अवस्थामा थियो र आक्रमणबाट संरचनात्मक क्षति पुगेको छ। सामाजिक सञ्जालमा सार्वजनिक भएका भिडियोहरूमा जहाजमा आगलागी भएको देखिन्छ, यद्यपि कुनै मानवीय क्षतिको विवरण आएको छैन।
दुबई मिडिया अफिसले घटनापछि आपतकालीन सेवा तुरुन्त परिचालन गरिएको जनाएको छ। समुद्री अग्निनियन्त्रण टोलीहरूले आगो निभाउने प्रयास गरिरहेका छन् र स्थिति नियन्त्रणमा लिन आवश्यक प्रक्रिया अपनाइएको उल्लेख गरिएको छ।
यसैबीच, बेलायती सेनासँग सम्बन्धित युनाइटेड किंगडम म्यारिटाइम ट्रेड अपरेशन्स (यूकेएमटीओ)ले पनि आक्रमण पुष्टि गर्दै जहाज दुबईबाट करिब ३१ नटिकल माइल टाढा रहेको बेला लक्षित भएको जनाएको छ। हालसम्म वातावरणीय क्षतिको औपचारिक पुष्टि भएको छैन।
यो घटना मध्यपूर्व क्षेत्रमा बढ्दो तनावबीच समुद्री मार्गमा भइरहेका आक्रमणहरूको निरन्तरता मानिएको छ। विशेषगरी स्ट्रेट अफ होर्मुज आसपासका जलमार्गमा व्यापारिक जहाजहरू जोखिममा परिरहेका छन्।
घटनापछि तेल बजारमा तत्काल प्रतिक्रिया देखिएको छ। अन्तर्राष्ट्रिय सञ्चारमाध्यम ‘ब्लूमबर्ग’का अनुसार डब्ल्यूटीआई कच्चा तेलको मूल्य ३.४ प्रतिशतले बढेर प्रति ब्यारेल १०६ डलरभन्दा माथि पुगेको छ। यसअघि सोमबार मात्रै यो सूचक सन् २०२२ यताकै पहिलो पटक १०० डलर पार गरेको थियो।
