टोकियो । अमेरिकी राष्ट्रपति डोनाल्ड ट्रम्पले इरानसँगको युद्ध चाँडै अन्त्य हुन सक्ने संकेत गरेपछि विश्व बजारमा कच्चा तेलको मूल्य ओरालो लागेको छ। बिहीबार बिहानै ब्रेन्ट क्रुडको मूल्य प्रति ब्यारेल १.१६ डलरले घटेर १०० डलरमा झरेको छ भने अमेरिकी वेस्ट टेक्सस इन्टरमिडिएटको मूल्य १.४१ डलरले घटेर ९८.७१ डलर प्रति ब्यारेल कायम भएको हो।
ट्रम्पले रोयटर्ससँगको कुराकानीमा अमेरिकाले इरानसँगको युद्ध ‘छिट्टै’ समाप्त गर्ने बताएपछि लगानीकर्ताहरूमा उत्साह छाएको हो। बजार विश्लेषकहरूका अनुसार ट्रम्पको आगामी सम्बोधनमा युद्धबाट पछि हट्ने नरम नीति आउने अपेक्षाले तेलको मूल्यमा भारी गिरावट आएको हो।
आइजी मार्केटका विश्लेषक टोनी साइकामोरले इरान द्वन्द्व अन्ततः अन्त्य हुने आशामा बजारमा बिक्रीको चाप बढेको बताएका छन्। यद्यपि, अमेरिका पछि हट्दैमा स्ट्रेट अफ होर्मुजको सुरक्षा र स्वतन्त्र आवतजावतको ग्यारेन्टी नहुने भन्दै केही जोखिम अझै बाँकी रहेको उनले चेतावनी दिएका छन्।
क्षेत्रीय तनाव भने अझै साम्य भइसकेको छैन। बुधबार मात्रै कतार इनर्जीले भाडामा लिएको एक तेल ट्याङ्करमा कतारी समुद्री क्षेत्रमै इरानले क्रुज मिसाइल प्रहार गरेको थियो। यस्ता घटनाले सामुद्रिक ढुवानीमा जोखिम बढाइरहेको छ।
अर्कोतर्फ, अन्तर्राष्ट्रिय ऊर्जा एजेन्सीका प्रमुखले युद्ध सुरु हुनुअघि गरिएका सम्झौताका कारण अहिलेसम्म जोगिएको युरोपेली अर्थतन्त्रमा अप्रिलदेखि तेल आपूर्तिको अभावले प्रत्यक्ष असर पार्न थाल्ने भन्दै सतर्क गराएका छन्।
युद्धविरामको औपचारिक सम्झौता नभएसम्म र ऊर्जा क्षेत्रका पूर्वाधारहरू सुरक्षित नभएसम्म तेलको मूल्यमा अस्थिरता कायम रहने विज्ञहरूको बुझाइ छ।
