काठमाडौँ । इरानले शनिबार दिउँसो होर्मुज स्ट्रेटमा कच्चा तेल र ग्यास लिएर भारत आउँदै गरेका दुई वटा जहाजमाथि गोली प्रहार गरेको छ ।
समाचार एजेन्सी पीटीआईका अनुसार इरानको रिभोलुसनरी गार्डले भारततर्फ आउँदै गरेका १४ वटा जहाजलाई होर्मुज स्ट्रेट पार गर्नबाट रोकेको थियो ।
गोलीबारीपछि १३ वटा जहाज फारसको खाडीमा विभिन्न ठाउँमा फर्केका थिए । एक जहाजमा गोली लागेको थियो भने अर्को एउटा जहाज स्ट्रेट पार गर्न सफल भएको थियो ।
घटनापछि भारतको विदेश मन्त्रालयले भारतका लागि इरानका राजदूत डा मोहम्मद फथालीलाई बोलाएर कडा विरोध जनाएको छ ।
विदेश मन्त्रालयले एक विज्ञप्ति जारी गर्दै इरानले पहिले पनि भारतीय जहाजहरूलाई सुरक्षित मार्ग दिँदै आएको स्मरण गराउँदै, छिट्टै जहाजहरूको आवतजावत पुनः सुरु गर्न माग गरेको छ ।
इरानले यसअघि होर्मुज स्ट्रेट बन्द गर्ने घोषणा गरेको थियो। अमेरिकाले युद्धविरामको उल्लंघन गरिरहेको इरानको आरोप थियो । यद्यपि उसले २४ घण्टाभित्रै आफ्नो निर्णय परिवर्तन गरेको थियो ।
