बेइजिङ । इरानी तेल खरिद गरेको भन्दै अमेरिकाले चिनियाँ कम्पनीहरूमाथि लगाएको प्रतिबन्धलाई चीनले मान्यता नदिने स्पष्ट पारेको छ।
चिनियाँ वाणिज्य मन्त्रालयले शनिबार एक विज्ञप्ति जारी गर्दै पाँच चिनियाँ कम्पनीमाथि चालिएको अमेरिकी कदम अन्तर्राष्ट्रिय कानुन र सम्बन्धका मूल सिद्धान्तविपरीत रहेको दाबी गरेको हो।
बेइजिङले आफ्ना कम्पनी र संस्थाहरूलाई यी प्रतिबन्धहरू लागू नगर्न निर्देशन दिँदै अन्य देशसँग गरिने सामान्य आर्थिक तथा व्यापारिक कारोबारमा अवरोध पुर्याउने कुनै पनि निर्णय आफूलाई स्वीकार्य नहुने चेतावनी दिएको छ। संयुक्त राष्ट्रसंघको स्वीकृतिबिना र अन्तर्राष्ट्रिय कानुनको आधारविना लगाइने एकपक्षीय प्रतिबन्धको चीनले सधैँ विरोध गर्दै आएको मन्त्रालयले उल्लेख गरेको छ।
अमेरिकाले हालै मात्र एक चिनियाँ कम्पनीले लाखौँ ब्यारेल इरानी कच्चा तेल आयात गरेर इरानका लागि अर्बौँ डलर आम्दानी जुटाइदिएको आरोप लगाउँदै थप प्रतिबन्धको घोषणा गरेको थियो। यद्यपि चिनियाँ वाणिज्य मन्त्रालयले आफ्नो आधिकारिक भनाइमा ती कम्पनीहरूको नाम भने किटान गरेको छैन।
यो कूटनीतिक तनाव यस्तो समयमा सतहमा आएको छ जब अमेरिकी राष्ट्रपति डोनाल्ड ट्रम्प यसै महिना चीन भ्रमणमा जाने र चिनियाँ राष्ट्रपति सी जिनपिङसँग भेटवार्ता गर्ने तयारीमा छन्।
