पेन्सिलभेनिया । अमेरिकाको Pennsylvania मा एक व्यक्तिले श्रीमतीले सम्बन्धविच्छेदका लागि निवेदन दिएको थाहा पाएपछि एक्स्काभेटर प्रयोग गरेर आफ्नै घर भत्काएको घटना सार्वजनिक भएको छ ।
४८ वर्षीय एरिक प्रिब्जाले श्रीमतीले वैवाहिक सम्बन्ध अन्त्य गर्ने प्रक्रिया सुरु गरेको थाहा पाएपछि आक्रोशमा आएर घरमा तोडफोड गरेका हुन्। स्थानीय सञ्चारमाध्यमका अनुसार मदिरा सेवन गरेका उनले घटनाभन्दा अघिल्लो रात श्रीमतीलाई “सम्बन्ध सकिएको हो भने म घर नै भत्काइदिन्छु” भनेका थिए ।
त्यसपछि उनले निर्माण कार्यमा प्रयोग हुने एक्स्काभेटर चलाउँदै घरको पछाडिको भागदेखि संरचना भत्काउन थाले। घटनाका क्रममा श्रीमतीले आपतकालीन सेवामा फोन गरेकी थिइन्। फोन गर्दा पृष्ठभूमिमा घर भत्किएको ठूलो आवाज सुनिएको बताइएको छ ।
त्यो समयमा घरभित्र रहेका श्रीमती र दुई छोरी सुरक्षित रूपमा बाहिर निस्कन सफल भएका कारण कुनै मानवीय क्षति भएन ।
पछि उनले घरभित्रबाट आफ्ना केही सामान लिएर घटनास्थल छाडेका थिए। त्यसपछि प्रहरीले उनलाई पक्राउ गरेको हो। उनीविरुद्ध सार्वजनिक जोखिम निम्त्याउने, अरूको ज्यान खतरामा पार्ने र शान्ति भंग गर्ने आरोपमा मुद्दा दर्ता गरिएको छ।
अधिकारकर्मीहरूका अनुसार घरमा भएको संरचनात्मक क्षति गम्भीर भएकाले मर्मत सम्भव भए पनि पूर्ण रूपमा भत्काउनुपर्ने अवस्था आउन सक्ने प्रारम्भिक मूल्यांकन गरिएको छ।
