काठमाडौं — भियतनामको फु क्वक टापु नजिक भारतीय पर्यटक सवार स्पिडबोट पल्टिँदा कम्तीमा १५ जनाको मृत्यु भएको छ। दुर्घटनामा घाइते भएका २३ जनाको उद्धार गरी उपचार भइरहेको छ।
स्थानीय सञ्चारमाध्यमका अनुसार शनिबार दिउँसो करिब १ बजे ३२ जना भारतीय पर्यटक तथा चालक दलका सदस्य सवार स्पिडबोट दुर्घटनामा परेको हो। एजी–२६७५१ दर्ता नम्बरको उक्त स्पिडबोट मिन्ह हुई फु क्वक ट्रेडिङ एन्ड टुरिजम कम्पनी लिमिटेडको रहेको बताइएको छ।
प्रारम्भिक जानकारीअनुसार स्पिडबोट होन मे रुट न्गोआईबाट करिब ४०० मिटर अगाडि पुगेपछि अचानक प्राविधिक समस्या आएर पल्टिएको थियो। दुर्घटनापछि सबै यात्रु र चालक दलका सदस्य समुद्रमा खसेका थिए।
सार्वजनिक भिडियोहरूमा दुर्घटनाका बेला समुद्रमा तीव्र हावा र ठूला छाल देखिन्छन्। उद्धार टोलीले लाइफगार्ड फ्याँक्दै पानीमा फसेकाहरूको उद्धार गरेको तथा जेट स्कीमार्फत उनीहरूलाई किनारसम्म पुर्याएको देखिएको छ।
उद्धार अभियानका लागि सीमा सुरक्षा बलले दुई वटा डुङ्गा र ३५ जना सुरक्षाकर्मी परिचालन गरेको छ। यस अभियानमा नौसेना, तटरक्षक बल तथा अन्य सम्बन्धित निकायसमेत सहभागी भएका छन्।
दुर्घटना भएको होन मे रुट क्षेत्र फु क्वकको लोकप्रिय पर्यटकीय गन्तव्य मानिन्छ। प्राकृतिक सौन्दर्य र कोरल रिफ डाइभिङका लागि प्रसिद्ध यस क्षेत्रमा पुग्न पर्यटकहरूले प्रायः डुङ्गा प्रयोग गर्ने गर्छन्। हाल दुर्घटनाको कारणबारे थप अनुसन्धान भइरहेको छ।
