काठमाडौँ । पूर्व मन्त्री एवम् एमालेका केन्द्रीय सदस्य वसन्तकुमार नेम्वाङ अस्वस्थ भएका छन् । ताप्लेजुङका इन्चार्ज रहेका नेम्वाङ जिल्ला कमिटीको सचिवालय बैठकमा अचानक ढलेका थिए ।
उनलाई तत्काल जिल्ला अस्पताल ताप्लेजुङ पुर्याएको थियो । तर त्यहाँ उपचार सम्भव नभएपछि हेलिकप्टरमार्फत काठमाडौँ ल्याउने तयारी भइरहेको प्रेम गुरागाईँले जानकारी दिएका छन् ।
‘उहाँ जिल्ला कमिटीको सचिवालयमा भाग लिन जानुभएको थियो । अचानक बिरामी परेपछि जिल्ला अस्पताल लगियो । प्रेसरले हानेको डाक्टरले जानकारी दिएका छन् । अहिले हेलिकप्टरमार्फत काठमाडौँ ल्याउने तयारी भइरहेको छ’, उनको अवस्थाबारे जानकारी दिँदै उनले भने ।
नेम्वाङलाई पक्षघात नै भएको हो कि होइन भन्ने विषयमा डाक्टरले केही नभनेको बताए । काठमाडौँमा कुन अस्पताल भर्ना गर्नेबारे जानकारी दिएको छैन ।
