काठमाडौ । नेपाली काङ्ग्रेस पर्साका पूर्व उपसभापति अशोक जयसवालको निधन भएको छ । काङ्ग्रेस पर्साका क्रियाशील नेता जयसवालको ५५ वर्षको उमेरमा निधन भएको हो ।
झन्डै सात वर्षदेखि ‘एमएन्डी’ नामक रोगले ग्रसित जयसवालको वीरगञ्जस्थित नेपाल मेडीसिटी वयोधा अस्पतालमा उपचारका क्रममा मृत्यु भएको परिवार निकट स्रोतले जनाएको छ ।
रोगका कारण जयसवाल लामो समयदेखि शारीरिक रूपमा अशक्त भइसकेका थिए । यद्यपि चिकित्सकहरूको निगरानीमा भने उनको उपचार चलिरहेको थियो ।
अचानक स्वास्थ्यमा समस्या आएपछि उनलाई अस्पतालमा भर्ना गरिएको बुझिएको छ । उपचारको क्रममा उनको निधन भएको अस्पताल प्रशासनले जनाएको छ ।
काङ्ग्रेस पर्साका पूर्व सचिव समेत रही सकेका जयसवाल पर्साको रामनगरी निवासी भए पनि उनी वीरगञ्ज – ११ रानीघाटमा बस्दै आएका थिए । उनका दुई छोरा र तीन छोरी छन् ।
जयसवालको आजै हिन्दू धर्म संस्कृति अनुसार अनितिम संस्कार गर्ने तयारी भइरहेको परिवार निकट स्रोतले जनाएको छ ।-यात्राडेलीबाट
