नयाँ दिल्ली । कतारको अदालतले कतारको जेलमा रहेका भारतीय नौसेनाका आठ पूर्व अधिकारीको मृत्युदण्डको सजाय घटाएको छ । भारतीय विदेश मन्त्रालयले विज्ञप्ति जारी गर्दै यसको जानकारी दिएको हो ।
मन्त्रालयले भनेको छ, ‘दहरा ग्लोबल मुद्दामा आज कतारको अदालतको आदेश आएको छ, जसमा सजाय घटाइएको छ । हामी पूर्ण आदेशको लागि पर्खिरहेका छौँ। दण्ड सजाय पाएका परिवारसहित कतारका लागि हाम्रा राजदूत र अन्य अधिकारीहरू आज अदालतमा उपस्थित थिए ।’
विज्ञप्तिमा भनिएको छ, ‘हामी सुरुदेखि नै उनीहरूको साथमा उभिरहेका छौँ र हामी उनीहरूलाई कन्सुलर र कानुनी सहयोग गरिरहेका छौँ । हामी यो विषय कतार प्रशासनसँग पनि उठाउनेछौँ ।’
सेप्टेम्बर २०२२ मा, कतार सरकारले ८ पूर्व भारतीय नौसेनालाई पक्राउ गरेको थियो। मार्चमा उनीहरूविरुद्ध जासुसीको आरोप लगाइएको थियो। पक्राउ परेका आठ जना भारतीय नागरिक पूर्व नौसेना अधिकृत हुन् र उनीहरु कतारको जाहिरा अल अलामी नामक कम्पनीमा काम गर्थे ।
यो कम्पनीले कतार नौसेनाका लागि पनडुब्बी कार्यक्रममा काम गरिरहेको थियो । यस कार्यक्रमको उद्देश्य राडारबाट बच्न सक्ने उच्च प्रविधियुक्त इटालियन प्रविधिमा आधारित पनडुब्बीहरू प्राप्त गर्नु थियो। कम्पनीमा ७५ भारतीय नागरिक कर्मचारी थिए । तीमध्ये अधिकांश भारतीय नौसेनाका पूर्व अधिकारी थिए। मे महिनामा कम्पनीले मे ३१, २०२२ देखि कम्पनी बन्द गर्ने बताएको थियो ।
जासुसीको आरोपमा पक्राउ परेका आठ कर्मचारीलाई यसअघि नै बर्खास्त गरिसकेको छ र उनीहरुको तलब पनि मिलाइएको छ । गत मे, कतारले कम्पनी बन्द गर्ने आदेश दियो र आफ्ना करिब ७० कर्मचारीलाई मे २०२३ को अन्त्यसम्ममा देश छाड्न निर्देशन दिएको थियो।
भारतीय सञ्चारमाध्यम र अन्य विश्वव्यापी सञ्चारमाध्यममा आएका रिपोर्टहरूका अनुसार यी पूर्व नौसेनाहरूमाथि इजरायललाई उच्च उन्नत इटालियन पनडुब्बीहरू खरिद गर्ने सम्बन्धमा कतारको गुप्तचर कार्यक्रमबारे कथित रूपमा जानकारी उपलब्ध गराएको आरोप लगाइएको छ। यसको मतलब यी नाविकहरूलाई पनि इजरायलको लागि जासुसी गरेको आरोप लगाउन सकिन्छ।
