काठमाडौँ । नेपाल वायु सेवा निगमले सुपर ग्लु लगाएर जहाज उडाउन खोजेको भनेर गलत अफवाह फैलाइएको बताएको छ । निगमले यो हल्ला असत्य रहेको समेत बताएको छ ।
निगमद्वारा जारी एक सूचनामा भनिएको छः ‘निगमको एउटा जहाज उडेको र ३ वटा जहाज ग्राउन्डेड भएको भन्ने कुरा असत्य हो । सुपर ग्लु लगाएर जहाज उडाउन खोजेको भन्ने गलत अफवाह फैलाइएको हो, यो पनि असत्य हो ।’
निगमले अहिले २ वटा जहाज बाहिरी देशमा उडिरहेको र अर्को एउटा जहाज (वाइड बडी) सेप्टेम्बरको पहिलो हप्ताभित्र इटालीबाट बनेर आउने जनाएको छ । जहाज मर्मत कार्य विशिष्ट कार्य भएकोले अन्तर्राष्ट्रिय स्तर र सुरक्षा मापदण्ड पुरा गर्नुपर्ने हुँदा यसमा कसैले दबाब दिएर सुरक्षासँग सम्झौता गर्न नसकिने समेत निगमले जनाएको छ । निगमले जहाज पूर्णरुपमा सुरक्षित तवरले मर्मत भई आउने र एक हप्ताभित्र उडानमा जाने समेत जनाएको छ ।
निगमले अर्को एउटा जहाज २८ अगस्टमा मर्मतका लागि इटाली गइसकेकोले पूर्वनिर्धारित समय एक महिनाभित्र उडानमा आउने अपेक्षा गरिएको जनाएको छ । दसैँ तिहारमा ४ वटै जहाज(अन्तर्राष्ट्रिय) उडानमा ल्याउने गरी कार्य भइरहेको समेत निगमको भनाई छ ।
