काठमाडौँ । नेपाली कांग्रेसकी नेतृ एवं परराष्ट्रमन्त्री डा.आरजु राणा देउवा र एमालेका नेता एवं पूर्वपरराष्ट्रमन्त्री प्रदीप ज्ञवाली सोमबार भारत भ्रमणबाट फर्केका छन् ।
उनीहरू दुवै जना प्रधानमन्त्री केपी शर्मा ओलीको भारत भ्रमणको चाँजो मिलाउन भारतको दिल्ली पुगेका थिए । तर उनीहरूको भ्रमणको उद्देश्य पूरा नभएको स्रोत बताउँछ ।
यहाँसम्म कि, उनीहरू दुवै जनाले भारत सरकारको आधिकारिक प्रतिनिधिसँग प्रधानमन्त्री ओलीको भारत भ्रमणबारे छलफलसमेत गर्न सकेनन् । परराष्ट्रमन्त्री आरजु जर्मनी हुँदै पुस ४ गते दिल्ली पुगेकी थिइन् भने एमालेका उपमहासचिव ज्ञवाली काठमाडौँबाट पुस ५ गते दिल्ली पुगेका थिए ।
दुवै जनाको उद्देश्य नेपाल–भारतबिच पछिल्लो समय चिसिँदै गरेको सम्बन्धलाई सुधार गरेर प्रधानमन्त्री ओलीको भारत भ्रमण गराउनु थियो । त्यसका लागि भारत सरकार पक्षका व्यक्तिसँग उच्चस्तरीय भेटघाट गरी आवश्यक वातावरण बनाउने योजना थियो ।
तर परराष्ट्रमन्त्री आरजु र एमाले नेता ज्ञवालीले भारत सरकारका आधिकारिक प्रतिनिधिसँग भेट नै गर्न पाएनन् । उनीहरूले भेटका लागि प्रयास गरे पनि भारतीय पक्षबाट भेट्न नमानेपछि खाली हात फर्केका हुन् ।
