वेल्स । वेल्समा एक २६ वर्षीय युवक अस्पतालको छतबाट ‘ग्रिम रिपर’ अर्थात् भूतको पोसाक लगाएर बिरामी, आगन्तुक र कर्मचारीलाई तल हेरेपछि पक्राउ परेका छन् ।
वेल्सको डेगन्वीका लियोन गिलेस्पीलाई जुन ६ मा डेनबिगसायरको सेन्ट आसाफस्थित इस्बिटी ग्लान क्ल्विड अस्पतालको प्रवेशद्वारमाथि छतमा उभिएको अवस्थामा देखिएको थियो । स्थानीय प्रहरीलाई उद्धृत गर्दै द इन्डिपेन्डेन्ट र मेट्रो यूकेले जनाएअनुसार उनले कालो हुडसहितको पोसाक लगाएका थिए ।
प्रत्यक्षदर्शीका अनुसार गिलेस्पी छतमा लगभग निश्चल अवस्थामा उभिएर तल रहेका मानिसहरूलाई हेरिरहेका थिए । उनको हातमा लामो धारिलो हतियारजस्तो देखिने वस्तु पनि रहेको बताइएको छ । घटनापछि उत्तर वेल्स प्रहरी र दमकल टोली अस्पताल पुगेका थिए । प्रहरीका अनुसार करिब ५० मिनेटसम्मको हानाछापपछि गिलेस्पीलाई पक्राउ गरिएको थियो ।
पछि गिलेस्पीले उचित कारणबिना राष्ट्रिय स्वास्थ्य सेवा (एनएचएस)को परिसरमा अवरोध वा अशान्ति सिर्जना गरेको अभियोग स्वीकार गरेका थिए । अदालतमा उनले किन ‘ग्रिम रिपर’को पोसाक लगाएर अस्पतालको छतमा चढे भन्नेबारे कुनै कारण प्रस्तुत गरिएको थिएन ।
अदालतमा ‘काग’जस्तो पोसाकको वर्णन
अदालतमा गिलेस्पीले लगाएको पोसाकलाई ‘ग्रिम रिपर’का साथै ‘काग’जस्तो देखिने पोसाकका रूपमा पनि वर्णन गरिएको थियो । अस्पताल सञ्चालन गर्ने बेट्सी क्याडवालाडर युनिभर्सिटी हेल्थ बोर्डले अस्पतालमा यस्ता हरकतप्रति आफ्नो नीति ‘शून्य सहनशीलता’ रहेको जनाएको छ । स्वास्थ्य संस्थाले भनेको छ, ‘हेल्थ बोर्डले आफ्ना अस्पताल परिसरमा दुर्व्यवहार, आक्रामकता वा अवरोधप्रति शून्य सहनशीलताको नीति रहेको यसअघि नै स्पष्ट गरिसकेको छ ।’
अधिकारीहरूका अनुसार गिलेस्पीमाथि एनएचएसका कर्मचारी वा अस्पतालमा रहेका अन्य व्यक्तिलाई अवरोध वा अशान्ति सिर्जना गरेको तथा प्रहरीले परिसर छाड्न निर्देशन दिँदा पनि अटेर गरेको आरोप लगाइएको थियो ।
बिरालोको खाना र अन्य सामान चोरी गरेको पनि स्वीकार
अस्पतालको घटनाबाहेक गिलेस्पीले दुई वटा छुट्टाछुट्टै चोरीका घटनामा पनि दोष स्वीकार गरेका छन् । वेल्सको द लिडर पत्रिकाका अनुसार उनले मार्च २६ मा ल्यान्डुड्नोस्थित पेट्स एट होम पसलबाट करिब ३० देखि ४० पाउन्ड मूल्य बराबरको बिरालोको खाना चोरी गरेको स्वीकार गरे ।
त्यस्तै, मे २८ मा ल्यान्डुड्नोस्थित सेन्सबरीज पसलबाट खाना तथा पेय पदार्थ चोरी गरेको पनि उनले स्वीकार गरेका थिए ।
अदालतले गिलेस्पीलाई क्षतिपूर्तिबापत ५० पाउन्ड, जरिवानाबापत १०० पाउन्ड र क्राउन प्रोसिक्युसन सर्भिसको खर्चबापत १०० पाउन्ड तिर्न आदेश दिएको छ । अस्पतालमा सिर्जना गरेको अवरोधका लागि मात्रै उनलाई २०० पाउन्ड जरिवाना गरिएको छ ।
