काठमाडौं । नेपाली कांग्रेसका सभापति तथा पूर्वप्रधानमन्त्री शेरबहादुर देउवाले काठमाडौं महानगरपालिकाका मेयर बालेन शाहका गतिविधि अराजनीतिक र असहिष्णु भएको बताएका छन् ।
मंगलवार बिहान देउवा निवास बुढानीलकण्ठ पुगेका एमाले काठमाडौंका नेताहरूसँग कुरा गर्दै उनले काठमाडौं महानगरका मेयर शाहका अभिव्यक्ति र गतिविधिप्रति आक्रोश व्यक्त गरेका हुन् ।
देउवाले मेयरका अराजक गतिविधिको जिम्मेवार र संयमित ढंगले प्रतिवाद गर्नुपर्ने समेत बताएका छन् ।
देउवासँगको भेटमा महानगरका मेयरको बारेमा कुरा नभए पनि खुलामञ्चमा देउडा पर्वको अवसरमा भएको अराजक गतिविधिको प्रसंग निस्किएको एमाले काठमाडौं जिल्ला कमिटी अध्यक्ष दीपक निरौलाले बताए । उनले बालेनको नाम लिएर भएको त्यस्ता गतिविधि छाडा र अराजक भएको भन्दै देउवाले आक्रोश व्यक्त गरेको बताए ।
निरौलाले भने– खुलामञ्चको घटनाप्रति उहाँ अलि आक्रोशित हुनुहुन्छ । त्यो घटना नियोजितरुपमा गराइएको थियो । यसै प्रसंगमा काठमाडौं महानगरका मेयरस्तरीय निर्णयबाट नदी किनाराका बस्ती हटाउने गरी जारी भएको सूचनाको पनि कुरा भएको हो,उहाँले अराजनीतिक मान्छेहरूले भीड उक्साउँछन्,तर हामी जिम्मेवार दल भएकाले जिम्मेवार ढंगले गलत कुरा रोक्न लाग्नुपर्छ भन्ने आशय व्यक्त गर्नुभयो ।
देउवाले एमाले नेताहरूकै सामुन्नेबाट कानून मन्त्री अजय चौरसियालाई फोन गरी सर्वोच्च अदालतले नदी किनाराका दुवैतर्फका २०/२० मिटर वरपरका घर बस्ती उठाउने भनी गरेको फैसला अव्यवहारिक र असम्भव रहेको कुरा आएकाले फैसला पुनरावलोकनमा जान निर्देशन दिएका थिए ।
अदालतको सोही फैसलापछि मेयर शाहले महानगरबाट सूचना जारी गरेका थिए । सो सूचनाले महानगरवासी जनता आतंकित भएको भन्दै बुधवारको कार्यपालिका बैठकमा उपमेयर सुनिता डंगोलसहित वडाध्यक्षहरूले कार्यपालिकामा छलफल नगरी जारी भएको सूचना मान्य नहुने बताएका थिए ।
देउवाले मेयर बालेन शाहको क्रियाकलापप्रति आक्रोश व्यक्त गरे लगत्तै कांग्रेस सांसद सन्तोष चालिसेले संसदमा सर्वोच्चको फैसला पुनरावलोकनमा जानुपर्ने बताएका थिए ।
