काठमाडौं । राष्ट्रिय स्वतन्त्र पार्टीका सभापति रवि लामिछाने ग्यालेक्सी टेलिभिजनमा कार्यरत रहेको बेला एक करोड बढी तलब लिएको फेला परेको छ ।
सहकारीको बचत अपचलनको छानबिन गर्न बनेको संसदीय विशेष छानबिन समितिले सार्वजनिक गरेको प्रतिवेदनमा उल्लेख गरिएअनुसार लामिछाने ग्यालेक्सी टेलिभिजनको प्रबन्ध निर्देशक रहँदा एक करोड बढी तलब बुझेका हुन् ।
लामिछानेले आर्थिक वर्ष ०७८/०७९ मा मात्रै ७४ लाख ३६ हजार ५ सय ८७ रुपैयाँ तलबस्वरुप लिएका छन् । आर्थिक वर्ष ०७७/७८ मा उनले ३० लाख तलब लिएको प्रतिवेदनमा उल्लेख छ ।
लामिछानेले १ करोड ४ लाख ३६ हजार ५ सय ८७ रुपैयाँ तलब लिएका छन् । समितिले लामिछानेलाई सहकारीबाट गोर्खा मिडियामा आएको रकम खर्च गर्ने प्रक्रियामा प्रमुख भूमिका रहेको भन्दै दोषी ठहर गरेको छ ।
लामिछानेसहित गोर्खा मिडियाका सञ्चालक जीबी राई, छबिलाल जोशी र कुमार रम्तेललाई प्रचलित कानुन बमोजिम कारवाहीको सिफारिस पनि समितिले गरेको छ । तर रास्वपाका सभापति लामिछानेले आफू निर्दोष रहेको दाबी गर्दै आएका छन् ।
