काठमाडौं, ४ मंसिर । प्रधानमन्त्री केपी शर्मा ओली र नेपाली कांग्रेसका सभापति शेरबहादुर देउवाबीचको भेटवार्ता बाक्लिएको छ । प्रधानमन्त्री ओलीले राजनीतिक दल विभाजनसम्बन्धी अध्यादेश ल्याउन जोड गरिरहेको बेलामा सत्ता साझेदार दुई दलका प्रमुख नेताबीच तारन्तार भेटवार्ता हुनुलाई अर्थपूर्ण रुपमा हेरिएको छ। प्रधानमन्त्री ओलीले दशैंअघि नै दल विभाजनसम्बन्धी अध्यादेश ल्याउन खोजेका थिए ।
तर, कांग्रेसको अवरोधको कारण त्यो सफल हुन सकेन । सहकारी ठगी प्रकरणमा रास्वपाका सभापति रवि लामिछाने पक्राउअघि देउवासँग सहमति लिएर नै प्रधानमन्त्री ओलीले अध्यादेश ल्याउन खोजेका थिए । सुरुमा देउवाले पनि सहमति दिईएको बताईन्छ । तर, पार्टीभित्र शेखर कोइरालालगायतका नेताले विरोध जनाएपछि देउवा त्यसबाट ब्याक भएको बुझिन्छ । प्रधानमन्त्री ओलीले कार्यसम्पादन झुर भएका केही मन्त्रीहरुलाई विदा गर्न चाहेका छन् ।
उनीहरुको कारण आफूले समेत बदनामी खेप्नुपरेको उनको निश्कर्ष छ । एमालेबाट कम्तिमा चार जना मन्त्रीलाई विदा गरेर उनीहरुको ठाउँमा काम गर्नसक्ने मन्त्री ल्याउने उनको तयारीछ । कांग्रेस सभापति देउवाले भने सरकार बनेको ६ महिनापनि नपुग्दै मन्त्रीहरु हटाउँदा राम्रो सन्देश नजाने भन्दै मन्त्रिपरिषद् पूनर्गठनमा आफ्नो दलबाट सहभागी मन्त्रीहरुलाई नचलाउन भनेका छन् ।
तर, केही मन्त्रीहरुको कार्यशैली र विवादमा मुछिएको कारण पार्टीभित्रैबाट आलोचना भएपछि देउवाले पनि मन्त्रिपरिषद् पूनर्गठनको लागि प्रधानमन्त्री ओलीलाई सहमति दिईएको स्रोतको दाबी छ । यस्तै, प्रधानमन्त्री ओलीले चीन भ्रमणको विषयमा सभापति देउवासँग छलफल थालेका छन् । दुई नेताबीच हिजोपनि बालुवाटारमा दुई घण्टा लामो भेटवार्ता भएको थियो । त्यसको भोलिपल्टै आज दुई नेता पूनः भेट्ने भएका हुन् । भेट सिंहदरबारमा अपरान्ह ४ बजेका लागि तय भएको छ ।
