वासिङ्टन डिसी । डोनाल्ड ट्रम्प प्रशासनले स्मार्टफोन र कम्प्युटर लगायत धेरै इलेक्ट्रोनिक उत्पादनहरूलाई पारस्परिक शुल्कबाट छुट दिने निर्णयप्रति चीनले प्रतिक्रिया जनाएको छ।
चिनियाँ अधिकारीहरूले अमेरिकी राष्ट्रपति डोनाल्ड ट्रम्पलाई पारस्परिक करहरू ‘पूर्ण रूपमा रद्द’ गर्न आह्वान गरेका छन्। ट्रम्पको पारस्परिक कर लागू भएदेखि नै विश्वका दुई ठुला अर्थतन्त्रहरू बिच ‘कर युद्ध’ चलिरहेको छ।
चीनको वाणिज्य मन्त्रालयले एक विज्ञप्तिमा भनेको छ, ‘हामी अमेरिकालाई आफ्ना गल्तीहरू सच्याउन, पारस्परिक करको गलत नीतिलाई पूर्ण रूपमा रद्द गर्न र पारस्परिक सम्मानको सही बाटोमा फर्कन प्रमुख कदम चाल्न आग्रह गर्दछौँ।’
ट्रम्प प्रशासनले हालै मोबाइल फोन र कम्प्युटर लगायत धेरै इलेक्ट्रोनिक उत्पादनहरूलाई पारस्परिक करबाट छुट दिने घोषणा गरेको छ। यसमा चीनबाट आयात गरिएका सामानहरू पनि समावेश हुनेछन्।
अप्रिल २ मा, अमेरिकी राष्ट्रपति ट्रम्पले विश्वका धेरै देशहरूबाट आउने उत्पादनहरूमा पारस्परिक शुल्क लगाएका थिए। ट्रम्पले चीन बाहेक विश्वका बाँकी देशहरूका लागि ९० दिनको अस्थायी रूपमा भन्सार महसुलमा छुट दिने घोषणा गरेका छन्।
अमेरिकाले चीनमाथिको भन्सार शुल्क १४५% सम्म बढाएको थियो भने अन्य देशहरूलाई ९० दिनको अस्थायी छुट दिएको थियो र पारस्परिक भन्सार शुल्कलाई समान रूपमा १०% मा घटाएको थियो।
अमेरिकी वाणिज्य सचिवले भने- छुट अस्थायी हो
अमेरिकी वाणिज्य सचिव हावर्ड लुटनिकले आइतबार एबीसी न्यूजलाई बताएअनुसार स्मार्टफोन र कम्प्युटर लगायत अन्य इलेक्ट्रोनिक्सलाई पारस्परिक करबाट छुट अस्थायी भएको बताए। लुटनिकले यस्ता शुल्कहरू छुट्टै ‘अर्धचालक शुल्क’ अन्तर्गत लगाउने योजना बताए । यो पछि घोषणा गरिनेछ।
अमेरिकाले यो कदम त्यस्तो समयमा उठाएको हो जब प्रविधि कम्पनीहरूले पारस्परिक शुल्कको बारेमा चिन्ता व्यक्त गरेका थिए।
