काठमाडौं । प्रेमीलाई आफू गर्भवती भएको झुटो खबर दिएकी दैलेखकी एक किशोरीले पछि आफुले बच्चा जन्माइसकेको भन्ने प्रेमीलाई देखाउन ३ महिनाको बच्चा चोरी गरेको खुलेको छ । किशोरीका प्रेमी भारतमा छन् ।
बच्चा चोरेर जंगलमा गएकी किशोरीलाई प्रहरीले जंगलबाटै पक्राउ गरेको हो । किशोरीले प्रहरीलाई बताएअनुसार उनी आफ्नै गाउँका एक युवकसँग प्रेममा थिइन्। उनका प्रेमी कामको सिलसिलामा भारतमा छन् । उनले प्रेमीलाई आफू गर्भवती भएको झुट बोलेकी थिइन् ।
भारतमा रहेका प्रेमीलाई देखाउनकै लागि उनले बच्चा चोरी गरेको अनुसन्धानबाट खुलेको प्रहरीले बताएको छ । किशोरीले दैलेखको ठाटीकाँध गाउँपालिका १ सिराडीका बमबहादुर बुढाकी तीन महिने छोरीलाई बिहीबार बेलुकी ९ बजेतिर घरभित्रै सुतेको समयमा चोरेर लगेकी थिइन्।
बच्चा चोरेपछि उनी जंगलमा गएर बसेकी थिइन् । बच्चा चोरेको करिब १२ घण्टापछि शुक्रबार बिहान ९ बजेतिर चामुण्डाबिन्द्रासैनी नगरपालिका ३ को लामिडाँडा जंगलबाट किशोरीलाई पक्राउ गरी बालिकाको उद्धार गरेको थियो। बालिका रोएपछि दूधको खोजीका लागि किशोरी गाउँ पसेकी थिइन्। स्थानीयलाई शंका लागेपछि प्रहरीलाई खबर गरेका थिए।
