काठमाडौं । पहलगाम आक्रमणपछि भारतले ठुलो सैन्य कारवाही गर्न खोजेको संकेत देखिएको छ । भारतीत रक्षामन्त्री राजनाथ सिंहले सोमबार बिहान पहिलो पटक सेना प्रमुखलाई भेटे र लामो परामर्श गरे। त्यसपछि रक्षामन्त्री प्रधानमन्त्री निवास पुगे र त्यहाँ प्रधानमन्त्री नरेन्द्र मोदीलाई भेटे। राजनाथले पछिल्लो अवस्थाको बारेमा प्रधानमन्त्रीलाई अपडेट दिएका छन्।
रक्षामन्त्री सिंहले प्रधानमन्त्री मोदीसँग भेट गरी पहलगाममा जारी अपरेशन र अवस्थाको बारेमा जानकारी दिएका छन्। यसअघि, रक्षामन्त्री राजनाथ सिंह बिहान साउथ ब्लक पुगेका थिए, जहाँ उनलाई सेना प्रमुखले सैन्य अपरेशनको बारेमा जानकारी गराएका थिए।
एक दिन अघि मात्र प्रधानमन्त्री नरेन्द्र मोदीले मन की बातमा भनेका थिए, ‘पहलगाममा भएको आतंकवादी घटनाले देशका हरेक नागरिकलाई दुःखी बनाएको छ। प्रत्येक भारतीयलाई प्रभावित परिवारहरूप्रति गहिरो सहानुभूति छ। उनीहरू जुनसुकै राज्यका होउन् वा जुनसुकै भाषा बोल्छन् मैले यस आक्रमणमा आफ्ना प्रियजन गुमाएकाहरूको पीडा महसुस गरिरहेको छु।’
प्रधानमन्त्री मोदीले अगाडि भनेका थिए, ‘आतंककारी र उनीहरूका मालिकहरू कश्मीरलाई फेरि ध्वस्त पार्न चाहन्छन्, त्यसैले उनीहरूले यति ठूलो षड्यन्त्र रचे। म फेरि एकपटक पीडित परिवारलाई न्याय पाउने आश्वासन दिन्छु, न्याय अवश्य हुनेछ। यस आक्रमणका दोषी र षड्यन्त्रकारीहरूलाई कडा भन्दा कडा जवाफ दिइनेछ।’
