मियामी । लियोनेल मेस्सीले एकै खेलमा दुई गोल र एक असिस्ट दिएपछि इन्टर मियामीले डीसी युनाइटेडलाई ३-२ गोलले हराएको छ। यो जितसँगै मेस्सी मेजर लिग सकर (एमएलएस) को सर्वाधिक गोलकर्ताको सूचीमा २२ गोलका साथ शीर्ष स्थानमा पुगेका छन्।
शनिबार राति इन्टर मियामीको घरेलु मैदानमा भएको खेलमा मियामीको तर्फबाट टाडेओ एलेन्डेले खेलको सुरुआती गोल गरेका थिए।
खेलको ५३औँ मिनेटमा क्रिस्टियन बेन्टेकेले डीसी युनाइटेडका लागि बराबरी गोल फर्काएका थिए। तर, ६६औँ मिनेटमा मेस्सीले सुन्दर गोल गर्दै मियामीलाई फेरि अग्रता दिलाए। जोर्डी अल्बाले दिएको पासलाई मेस्सीले डीसीका डिफेन्डरहरूलाई छक्क्याउँदै गोल गरेका थिए।
खेलको ८५औँ मिनेटमा मेस्सीले व्यक्तिगत दोस्रो गोल गर्दै मियामीको जित सुनिश्चित गरे। यसपटक सर्जियो बुस्केट्सले दिएको पासलाई उनले डिफेन्डरलाई छक्क्याउँदै पेनाल्टी एरियाको छेउबाट प्रहार गरी गोल गरेका थिए।
मेस्सीको यो शानदार प्रदर्शनले उनलाई गोल्डेन बुटको दौडमा नासभिलका साम सरिजलाई पछि पार्दै शीर्ष स्थानमा पुर्याएको छ। सरिजले ओर्लान्डोसँगको खेलमा कुनै गोल गर्न सकेनन्।
यस खेलमा मेस्सीले ह्याट्रिक गर्ने सम्भावना पनि रहेको थियो, तर डीसीका गोलकिपर लुइस बाराजाले दोस्रो हाफमा उनका केही प्रहारलाई उत्कृष्ट बचाउ गरेका थिए। खेलको ७२औँ मिनेटमा मियामीका माटेओ सिल्भेटीले पेनाल्टीबाट गोल गर्न सकेनन्, जसको बल क्रसबारमा लागेर फर्किएको थियो।
त्यसपछि डीसीका वैकल्पिक खेलाडी ज्याकब मुरेलले गोल गर्दै हारको अन्तर घटाएका थिए।
यो जितपछि मियामी (१५ जित, ६ बराबरी, ७ हार) ले लिगमा लगातार दोस्रो जित दर्ता गरेको छ। यो जितले उनीहरूलाई इस्टर्न कन्फरेन्सको तालिकामा पाँचौँ स्थानमा पुर्याएको छ। तालिकाको शीर्ष स्थानमा रहेको फिलाडेल्फियाभन्दा उनीहरू अब ८ अङ्कले मात्र पछाडि छन्।
उता नयाँ प्रशिक्षक रेने विलरको नेतृत्वमा लगातार पाँच खेलमा डीसी युनाइटेडको यो पहिलो हार हो।
