काठमाडाैँ । भारतको बिहार विधान सभा निर्वाचनको मत परिणामलाई लिएर त्यहाँका मुख्यमन्त्री नीतीश कुमारले मतदाता, प्रधानमन्त्री नरेन्द्र मोदी र सहयोगी दलका नेताहरूप्रति आभार प्रकट गरेका छन् ।
मुख्यमन्त्री नीतीशकुमारले सामाजिक सञ्जाल ‘एक्स’मा चार नेताको नाम नै लिएर आभार प्रकट गरेका छन् । उनले प्रधानमन्त्री मोदी, सहयोगी घटकका नेताहरू चिराग पासवान, जीतनराम माँझी र उपेन्द्र कुशवाहाको नाम उल्लेख गर्दै आभार तथा धन्यवाद प्रकट गरेका हुन् ।
‘बिहार विधानसभा चुनाव–२०२५ मा राज्यवासीले हामीलाई भारी बहुमत दिएर हाम्रो सरकारप्रति विश्वास प्रकट गरेका छन्,’ नीतीशकुमारले एक्समा लेखेका छन्, ‘यसका लागि राज्यका सबै सम्मानित मतदातालाई मेरो नमन, हृदयदेखि नै आभार र धन्यवाद ।’
उनले प्रधानमन्त्री मोदीबाट प्राप्त सहयोगका लागि पनि हृदयबाटै आभार र धन्यवाद प्रकट गरेका छन् ।
एनडीए गठबन्धनले यो चुनावमा एकजुटता देखाएकै कारण बहुमत हासिल गरेको नीतीशकुमारले प्रस्ट पारेका छन् । यो जितका लागि गठबन्धनका साथीहरू चिराग पासवान, जीतनराम माँझी र उपेन्द्र कुशवाहालाई पनि धन्यवाद र आभार भन्दै उनले प्रतिक्रिया जनाएका छन् ।
उनले गठबन्धनका यिनै नेताहरूको सहयोगमा बिहार अझ अगाडि बढ्ने र देशकै सबैभन्दा धेरै विकसित राज्यको श्रेणीमा सामेल हुने विश्वास प्रकट गरेका छन् ।
