काठमाडौँ । राष्ट्रिय स्वतन्त्र पार्टी (रास्वपा) का वरिष्ठ नेता बालेन्द्र शाह, चर्चित बालेन शाह, आगामी प्रतिनिधिसभा निर्वाचनमा एमाले अध्यक्ष केपी शर्मा ओलीसँग प्रतिष्पर्धा गर्ने भएका छन्। रास्वपाका झापा प्रतिनिधिसँगको छलफलमा उनले जिल्लाको राजनीतिक अवस्था अध्ययन गरेका छन्, जानकारी जिल्ला सभापति प्रकाश पाठकले दिए।
पाठकका अनुसार, शाहको टिमले झापा-५ क्षेत्रको आन्तरिक सर्वेक्षण सम्पन्न गरिसकेको छ। यही आधारमा आगामी निर्वाचनका लागि तयारीका विषयमा बालेनले पार्टी जिल्ला समितिलाई जानकारी दिएका छन्। “उहाँले झापामै चुनाव लड्ने स्पष्ट संकेत दिनुभयो। माघ ६ गते र्यालीसहित उम्मेदवारी दर्ता गर्ने तयारी भएको छ,” पाठकले बताए।
आइतबार दिउँसो रास्वपा झापाको टोली ललितपुरको ज्वागल पुगेको थियो। शाहका साथी कुमार ब्यञ्जनकारको निवासमा साँझ ३:३० बजेसम्म बैठक भएको थियो। बैठकमा जिल्ला सभापति पाठक, सचिव शम्भु सुस्केरा, झापा-३ का क्षेत्रीय सभापति लक्ष्मण बस्नेत, झापा-५ का विभागीय सदस्य विरोध सुवेदी र अनुशासन आयोगका संयोजक अर्जुन उप्रेती उपस्थित थिए।
पाठकले भने, “निर्वाचनमा झापा-५ बाट ओलीलाई चुनौती दिन कुनै पनि कार्यकर्ता उठे पर्याप्त हुनेछ। बालेनजस्तो राष्ट्रिय व्यक्तित्व झापामा आउँदा हामी उत्साहित छौँ।” उनले थपे, “सुरुमा हाम्रो जानकारी बिना सर्वेक्षण गरिएको रहेछ। तर अब बालेन उठ्ने भएपछि ढुक्क छौँ। जनताको साथ हाम्रो साथमा छ।”
पछिल्लो समय रास्वपाले झापा केन्द्रित अभियान तीव्र बनाएको छ। प्रवक्ता मनिष झा, नेता निशा डाँगी, प्रमोद न्यौपाने, राजीव खत्री लगायतको टोलीले विभिन्न स्थानमा भेलाहरू सम्बोधन गर्दै निर्वाचन तयारीलाई गति दिएका छन्।
