काठमाडौं । रास्वपाको बन्दसूचीबाट हटाइएकी टासी ल्हाजोमले आफ्नो असन्तुष्टि सार्वजनिक गरेकी छन् । आफूले बन्दसूचीबाट नाम फिर्ता नलिएको भन्दै उनले कानूनी प्रक्रियामा जाने चेतावनीसमेत दिएकी छन् ।
विभिन्न विवादका कारण रास्वपाले टासीको नाम बन्दसूचीबाट हटाएको समाचार आज नेपाल प्रेसले प्रकाशित गरेको थियो । टासीको नेपाली नागरिकता विवादित छ भने उनी फ्री तिब्बत पक्षधर रहेको आरोप लागेको छ ।
फेसबुकमा टासीले लेखेकी छन्, ‘समाचार सत्य हो भने, मैले मेरो नाम बन्द सूचीबाट फिर्ता लिएको छैन, न त यो कार्यमा मेरो कुनै संलग्नता छ । मैले बारम्बार दोहोर्याएकी छु र फेरि भन्छु कि म तिब्बती होइन । म कुनै पनि तरिकाले ‘फ्री तिब्बत’ अभियानसँग जोडिएको छैन । मेरो तिब्बतीनय प्रेमीसमेत छैन ।’
आफूलाई आरोप लगाउनेलाई उनले प्रमाण देखाउन चुनौती दिएकी छन् ।
उनी थप्छिन्, ‘आफ्नो प्रमाण सार्वजनिक गर्नुहोस् । नेपालको सार्वभौम मुलुककी नागरिकको हैसियतले मलाई नेपालको संविधानले प्रत्याभूत गरेका सबै अधिकारहरू प्राप्त छन्, जसमा निर्वाचन लड्ने अधिकार पनि समावेश छ, चाहे प्रत्यक्ष होस वा समानुपातिक । कसैले पनि मेरो यो संवैधानिक अधिकारलाई अस्वीकार गर्ने वा बाधा पुर्याउने प्रयास गरेमा म कानुनी कारबाहीमा जानेछु ।’
