तेहरान । अमेरिकाका हजारौँ सैनिक पश्चिम एसिया क्षेत्रमा आइपुगेका छन् । इरान युद्ध चर्किरहेको समयमा शनिबार यी सैनिक क्षेत्रमा आइपुगेका हुन् । यसले क्षेत्रीय तनावबिच अमेरिकी सैन्य उपस्थिति थप मजबुत बनाएको छ ।
अमेरिकी सेनाको केन्द्रीय कमान्ड (सेन्टकम)का अनुसार यूएसएस ट्रिपोली नाम गरेको युद्धपोत पश्चिम एसिया आइपुगेको छ । यो जहाजले करिब ३ हजार ५०० नाविक र मरीन सैनिकसहितको एकाइको नेतृत्व गरिरहेको बताइएको छ ।
उक्त एकाइसँगै ढुवानी तथा आक्रमणका लागि प्रयोग हुने लडाकु विमानहरू पनि परिचालनमा रहेको बताइएको छ । यसले सम्भावित सैन्य कारबाहीका लागि अमेरिकाको तयारी तीव्र बनेको संकेत दिएको छ ।
यसअघि द वासिङ्टन पोष्टले पेन्टागनले इरानमा हप्तौँसम्म चल्न सक्ने स्थल सैन्य कारबाहीको तयारी गरिरहेको रिपोर्ट सार्वजनिक गरेको थियो । यद्यपि, ती योजनाहरूलाई अमेरिकी राष्ट्रपति डोनाल्ड ट्रम्पले स्वीकृति दिने वा नदिनेबारे अझै स्पष्ट भइसकेको छैन ।
