काठमाडौँ । ललितपुरमा सञ्चालित गोरखा सेभिङ्ग एण्ड क्रेडिटका अध्यक्ष सहित चार जनालाई प्रहरीले पक्राउ गरेको छ । ताल्छिखेलमा सञ्चालित गोरखा सेभिङ्ग एण्ड क्रेडिटका अध्यक्ष इमानसिंह राईसहित ४ जनालाई पक्राउ गरिएको उपत्यका अपराध अनुसन्धान कार्यालयका एसपी मनोहर भट्टले बताए ।
पक्राउ पर्नेमा गोरखा सेभिङ्ग एण्ड क्रेडिटका सीइओद्ववय लालबहादुर क्षेत्री र अबिनकुमार राई तथा लेखा समिति सदस्य कर्णबहादुर राई छन् ।
उनीहरूलाई चैत १८ मा उपत्यकाको विभिन्न ठाउँबाट पक्राउ गरेर थप अनुसन्धानको लागी जिल्ला प्रहरी परिसर ललितपुरमा पठाइएको एसपी भट्टले बताए । ललितपुर प्रहरीले आरोपीहरूविरुद्ध चार दिनको म्याद लिएर अनुसन्धान गरिरहेको छ ।
आरोपीहरूले बचतकर्ताको ४ अर्ब ५ करोड ६० लाख ६८ हजार रुपैयाँ अपचलन गरेको आरोप छ । सो सहकारीमा १० हजार ५९८ जना बचतकर्ता छन् ।
