काठमाडौँ । नेपाली कांग्रेसकी निवर्तमान केन्द्रीय सदस्य ईश्वरी न्यौपानेले पार्टीको साधारण सदस्य मात्रै रहने घोषणा गरेकी छन् । सर्वोच्च अदालतले गगन थापा पक्षलाई आधिकारिता दिएपछि शनिबार सामाजिक सञ्जाल फेसबुकमार्फत उनले सो घोषणा गरेकी हुन् ।
उनले अहिले कांग्रेस अत्यन्तै कठिन मोडमा रहेको बताउँदै एकता र सहकार्यको विकल्प नरहेको समेत बताएकी छन् । उनले भनेकी छन्– ‘आज हामी अत्यन्तै कठिन मोडमा छौँ, विचारले जितेको तर कांग्रेसीले हारेको स्थिति छ, एकता र सहकार्यको विकल्प पनि छैन । कांग्रेसी साथीहरू म सधैँ ऋणी छु र रहिरहने छु, तिनपल्ट केन्द्रीय सदस्यमा मलाई निर्वाचित गराउनुभएको छ । आजदेखि कांग्रेसको साधारण सदस्य मात्र रहेर तपाईंहरुले लगाएको ऋण तिर्न हरपल मेरो प्रयास रहनेछ।’
न्यौपानेले अदालतले विशेष महाधिवेशन पक्षधरलाई आधिकारिकता प्रदान गर्दै कांग्रेस विवादको न्यायिक टुङ्गो लगाए पनि दुई खेमामा विभाजित कांग्रेसी साथीहरूको मन कसरी जोडिन्छ भन्ने कुरा भविष्यले बताउने बताएकी छन् ।
उनले बीपी, गिरिजा र शेरबहादुर देउवाहरूले पार्टीलाई एकजुट बनाउन गरेको त्यागको पनि स्मरण गरेकी छन् ।
