काठमाडौँ । नेपाली कम्युनिस्ट पार्टी(नेकपा)को प्रवक्ताको जिम्मेवारी प्रकाश ज्वालाले पाएका छन् । सोमबार केन्द्रीय कार्यालय पेरिसडाँडामा बसेको केन्द्रीय संयोजन समितिको बैठकले ज्वालालाई प्रवक्ताको जिम्मेवारी दिएको एक नेताले जानकारी दिए ।
पार्टी एकताअघि उनी साविक नेकपा एकीकृत समाजवादीको प्रचार विभाग प्रमुख थिए । यस्तै बैठकले पूर्वप्रधानमन्त्री तथा वरिष्ठ नेता झलनाथ खनाललाई नीति तथा प्रतिष्ठान प्रमुख, अर्का वरिष्ठ नेता वामदेव गौतमलाई उत्पादन विभाग प्रमुखको जिम्मेवारी दिएको छ ।
नेता डा. वेदुराम भुसाललाई स्कुल विभाग प्रमुख र प्रमेश हमाललाई विदेश विभाग प्रमुखको जिम्मेवारी दिएको छ। तर अर्का एक नेताका अनुसार भूगोलको सात प्रदेश बाहेक अन्यको जिम्मेवारीमा कुरा नमिलेको जिकिर गरेका छन् ।
‘सात प्रदेशको जिम्मेवारी त्यही नै हो । विभाग र अन्यको जिम्मेवारीमा कुरा मिलिसकेको छैन । संयोजक र सहसंयोजकले थप छलफल गरेर भोलिको बैठकमा प्रस्तुत गर्छौँ भन्नुभएको छ’, ती नेताले भने।
