काठमाडाैँ। लोकप्रिय टेलिग्राम च्यानल ‘मास’ ले हालै मस्कोका एक दम्पतीको अनौठो कथा सार्वजनिक गरेको छ, जसले आफ्नी किशोरी छोरीको गम्भीर बिरामी पत्ता लगाउन डेढ वर्षभन्दा बढी समयदेखि प्रयास गरिरहेका थिए।
आमाका अनुसार उनकी १४ वर्षीया छोरीको शरीरबाट एक दिन अचानक रगत बग्न थालेको थियो र समय बित्दै जाँदा उनको लक्षण झन् खराब हुँदै गयो।
छोरीको अवस्था यतिसम्म नाजुक भयो कि उनको नाक, आँखा, कान, छाती, पाठेघर र नाइटोबाट समेत रगत बग्न थाल्यो। आमाबाबुले उनलाई धेरै पटक आपत्कालीन कक्षमा लगे र धेरै वटा स्वास्थ्य परीक्षण, अल्ट्रासाउन्ड, इन्डोस्कोपी र कोलोनोस्कोपी गराए, तर ती सबैको रिपोर्ट सामान्य आयो। एक पटक त डाक्टरहरूले ती बालिकाको क्यान्सरको समेत परीक्षण गरे, तर त्यो रिपोर्ट पनि नेगेटिभ आयो।
जवाफको खोजीमा डेढ वर्षसम्म अस्पतालहरू धाएपछि ती १४ वर्षीया बालिकाको परिवारले उनको लक्षणमा एउटा अनौठो ढाँचा फेला पार्यो। सेप्टेम्बर महिनामा विद्यालयको नयाँ शैक्षिक सत्र सुरु हुने समयमा उनी सधैँ बिरामी पर्थिन्, त्यसपछि विद्यालय बिदा हुने समयमा उनको रगत बग्ने क्रम कम हुन्थ्यो र गर्मी महिनाको बिदामा त यो पूर्ण रूपमा हराएर जान्थ्यो।
यी सबै कुराहरूलाई मिलाएर हेर्दा आमाबाबुले आफ्नी छोरीले विद्यालय जानबाट बच्नका लागि बिरामी भएको नाटक गरिरहेकी रहिछन् भन्ने कुरा महसुस गरे।
मासका अनुसार ती बालिकाकी आमा अझै पनि आफ्नी छोरीले आफैँलाई हानि पुर्याउन सक्छिन् र सबै अङ्गहरूबाट रगत बगेको देखाउन शरीरभरि रगत लतपत्याउन सक्छिन् भन्ने कुरामा विश्वास गर्न तयार छैनन्। उनी वैकल्पिक जवाफको खोजीमा अझै पनि डाक्टरहरूकहाँ धाइरहेकी छन्।
केही विज्ञहरूले ती किशोरी ‘मुन्चाउसेन सिन्ड्रोम’ बाट पीडित हुन सक्ने आशङ्का गरेका छन्, जुन यस्तो अवस्था हो जहाँ मानिसहरू अरूको हेरचाह र ध्यान आकर्षित गर्नका लागि जानाजानी बिरामीको लक्षणहरू देखाउने गर्छन्।
विगत डेढ वर्षदेखि धेरैजसो कक्षाहरू छुटाए पनि ती बालिकालाई अहिलेसम्म विद्यालयबाट भने निकालिएको छैन।
