सञ्जय मिश्रा,रौतहट, १९ भदौ । रौतहटको देवाही गोनाही नगरपालिका–३ गोठटोलमा प्रेम विवाह गरेको दुई महिना नबित्दै १८ वर्षीया नवविवाहिता सुमेदी कुमारी पटेलको शंकास्पद मृत्यु भएपछि घटना रहस्यमय बनेको छ। सुमेदीको शव घरको भान्सा कोठामा झुन्डिएको अवस्थामा फेला परेको हो।
मृतकका माइती पक्षले भने यो आत्महत्या नभई हत्या गरेर घटनालाई आत्महत्याको स्वरूप दिन खोजिएको हुनसक्ने आरोप लगाएका छन्। यद्यपि, घटनाको वास्तविक कारण भने पोस्टमार्टम रिपोर्ट र प्रहरी अनुसन्धानपछि मात्रै खुल्नेछ।
गरुडा नगरपालिका–७ पिपरिया निवासी सुमेदीले गत असार १९ गते देवाही गोनाही–३ का २२ वर्षीय रौनक राज पटेलसँग प्रेम विवाह गरेकी थिइन्। परिवारको सहमतिबिना विवाह गरेपछि उनी रौनककै घरमा बस्दै आएकी थिइन्।
तर, विवाहको खुसी लामो समय टिक्न पाएन। भदौ १७ गते बिहान करिब ५ बजे सुमेदीलाई घरको भान्सा कोठामा सालको पासो लगाई झुन्डिएको अवस्थामा उनकी सासुले देखेपछि प्रहरीलाई खबर गरिएको इलाका प्रहरी कार्यालय देवाही गोनाहीले जनाएको छ।
प्रेम विवाह गरेको दुई महिनामै ज्यान गुमाएकी सुमेदीको मृत्युले विवाहको सुरुवाती खुसीलाई एकाएक शोकमा बदलिदिएको छ। अझ घटनालाई लिएर माइती पक्षले दाइजोको दबाब र यातनाको आरोप लगाएपछि मृत्युको प्रकृतिमाथि थप प्रश्न उठेको छ।
मृतकका बुवा लालबाबु पटेलले विवाहपछि छोरीलाई दाइजोको नाममा मानसिक तथा शारीरिक यातना दिइएको आरोप लगाएका छन्। उनका अनुसार रौनक, उनका बुवा सुभाष पटेल र बहिनीले ६ तोला सुन, मोटरसाइकल, नगदलगायतका सामग्री दाइजोमा माग गर्ने गरेको थियो।
माइती पक्षका अनुसार मागअनुसार दाइजो दिन नसकेपछि सुमेदीमाथि कुटपिट, दुर्व्यवहार तथा मानसिक यातना बढ्दै गएको थियो। यही पृष्ठभूमिमा उनको मृत्यु भएको भन्दै परिवारले घटनालाई सामान्य आत्महत्याका रूपमा नलिई गम्भीर अनुसन्धान गर्न माग गरेको छ।
बुवा लालबाबुले छोरीको हत्या गरी शव झुन्ड्याएर आत्महत्या जस्तो देखाइएको हुनसक्ने आशंका व्यक्त गरेका छन्। तर, यो आरोपको स्वतन्त्र पुष्टि भइसकेको छैन।
घटनापछि सुमेदीको शव बिहीबार प्रादेशिक अस्पताल गौरमा पोस्टमार्टम गरिएको थियो। पोस्टमार्टमपछि बिहीबार साँझ नै अन्त्येष्टि गरिएको प्रहरीले जनाएको छ।
जिल्ला प्रहरी कार्यालय रौतहटका प्रवक्ता डीएसपी बसन्त गौतमले पोस्टमार्टम रिपोर्ट प्राप्त भएपछि मात्रै मृत्युको कारण यकिन हुने बताएका छन्।
यता, इलाका प्रहरी कार्यालय गरुडाका प्रमुख डीएसपी शंकरप्रसाद आचार्यका अनुसार माइती पक्षले बिहीबार रौनकसहितका व्यक्तिविरुद्ध कर्तव्य ज्यानसम्बन्धी जाहेरी दिन खोजेका थिए। तर पोस्टमार्टम रिपोर्ट आएपछि घटनाको प्रकृति हेरेर कानुनी प्रक्रिया अघि बढाउने सहमति भएपछि उनीहरू फर्किएका थिए।
सुमेदीको मृत्युले दाइजोको दबाब, वैवाहिक हिंसा र प्रेम विवाहपछि उत्पन्न हुने पारिवारिक तनावबारे गम्भीर प्रश्न उठाएको छ। आरोप प्रमाणित हुनु बाँकी रहे पनि विवाह गरेको दुई महिनामै युवतीको ज्यान जानु आफैंमा संवेदनशील विषय हो। त्यसैले घटनालाई केवल आत्महत्याको निष्कर्षमा सीमित नगरी दाइजोसम्बन्धी आरोप, पारिवारिक सम्बन्ध, सम्भावित यातना र मृत्यु हुनुअघिका परिस्थितिसमेत सूक्ष्म रूपमा अनुसन्धान गर्नुपर्ने देखिन्छ।
मृतकका आफन्तले घटनाको निष्पक्ष र गहिरो अनुसन्धान गरी सत्यतथ्य बाहिर ल्याउन तथा दोषी देखिए कानुनअनुसार कडा कारबाही गर्न माग गरेका छन्।
