काठमाडौं । पाकिस्तानको बलुचिस्तान प्रान्तमा मङ्गलबार सशस्त्र अतिवादीहरूले एक यात्रुवाहक रेलमा आक्रमण गरी यात्रुहरूलाई बन्धक बनाएका छन् ।
पृथकतावादी समूह बलोच लिबरेसन आर्मी (बीएलए)ले आक्रमणको जिम्मेवारी लिएको छ । यो आक्रमण क्वेटाबाट पेशावर जाँदै गरेको जाफर एक्सप्रेसमा भएको थियो ।
बीबीसी उर्दूका अनुसार पाकिस्तानी सैन्य स्रोतहरूले जाफर एक्सप्रेस आक्रमणपछि अहिलेसम्म १०४ यात्रुलाई उद्धार गरिएको दाबी गरेका छन् । यस कारबाहीमा १६ अतिवादी मारिएको बताइएको छ ।
यसैबीच, जाफर एक्सप्रेसका ८० यात्रु माछा रेलवे स्टेसन पुगेका छन्, जहाँ उनीहरूलाई प्राथमिक उपचार गरिएको छ ।
रेलवे अधिकारीहरूका अनुसार यस रेलमा ९ वटा कोच थिए र ४०० भन्दा बढी यात्रु यात्रा गरिरहेका थिए ।
पाकिस्तानका गृह राज्यमन्त्री तलाल चौधरीले जाफर एक्सप्रेसका धेरै यात्रुलाई अतिवादीहरूले रेलबाट ओरालेर पहाडी क्षेत्रमा लगेको बताएका छन् ।
