मुम्बइ, ३ बैशाख । अभिनेता सैफ अली खानमाथि हमलाको मुद्दामा चार्जशीट दायर भएपछि हरेक दिन नयाँ खुलासा भइरहेका छन् ।
अब यो प्रकरणमा नयाँ ट्विस्ट आएको छ । चार्जशीटका अनुसार पुलिस र फरेन्सिक टोलीले अभिनेताको घरबाट फेला पारेका औंठाछापहरू अभियुक्त शरीफुल इस्लाम शाहजादसँग मेल खाँदैनन्।
वास्तवमा सैफ अली खानको घरबाट कुल २० वटा फिंगरप्रिन्ट नमूनाहरू लिइएको थियो, जसलाई राज्य सीआईडी फिंगरप्रिन्ट ब्यूरोमा पठाइएको थियो। जसमध्ये १९ औँठाको छाप शरीफुलसँग मेल नखाएको खुलेको छ।
बाथरुमको ढोका, सुत्ने कोठाको ढोका र वार्डरोबको ढोकामा फेला परेको औंठाछाप शरीफुलको नभएको आरोपपत्रमा उल्लेख छ। तर, घटना भएको भवनको आठौं तल्लामा भेटिएको फिंगरप्रिन्ट शरीफुलसँग मिलेको छ। सैफको घर सतगुरु शरण अपार्टमेन्टको ११ औं तलामा छ, जहाँ उनीमाथि हमला भएको थियो।
मुम्बई प्रहरीले १२ अप्रिलमा बान्द्रा अदालतमा १६१३ पृष्ठभन्दा बढीको आरोपपत्र दायर गरेको थियो। आरोपपत्रमा यो पनि भनिएको छ कि आरोपी मोहम्मद शरीफुल इस्लाम शाहजाद भारतीय राहदानी लिनको लागि मात्र भारत आएकोसमेत खुलेको छ ।
सैफ अली खानलाई जनवरी १५ मा उनको घर सतगुरु शरण अपार्टमेन्टमा घुसेर आक्रमण गरिएको थियो । यसपछि सैफ आफै अस्पताल पुगेका थिए । उनको हात, ढाड र ढाडमा चोट लागेको थियो । उपचारपछि अभिनेता २१ जनवरीमा डिस्चार्ज भएका थिए । सो हमलाको दुई दिनपछि प्रहरीले बंगलादेशी नागरिक शरीफुल इस्लामलाई पक्राउ गरेको थियो ।
