मुम्बई, ६ बैशाख । बलिउडमा निर्माण हुन लागेको पौराणिक चलचित्र ‘रामायण’ बहुप्रतिक्षित चलचित्र मध्ये एक हो ।
नितेश तिवारीको निर्देशनमा बनिरहेको यो फिल्म दुई भागमा रिलिज हुँदैछ । निर्माता र निर्देशकले भगवान राम र सीताको कथालाई ठूलो स्तरमा देखाउन सक्दो प्रयास गरिरहेका छन्। हालै फिल्मको बारेमा एउटा ठूलो अपडेट आएको छ ।
चिल्लर पार्टी, दंगल, छिछोरे जस्ता चलचित्र बनाएका नितेश तिवारी अहिले पौराणिक चलचित्र रामायणमा केन्द्रित भएका छन् । भगवान रामको भूमिकामा रणवीर कपुर र आमा सीताको भूमिकामा साई पल्लवी छन । जो सन् २०२४ देखि नै फिल्मको सुटिङमा व्यस्त रहेका छन् । अहिले पहिलो भागको छायांकन लगभग सकिएको छ भने अब दोस्रो भागको पनि तयारी सुरु भएको छ ।
मिड–डेका अनुसार रणवीर कपुर, साई पल्लवी र अन्य कलाकारहरु यसै वर्षको मे महिनामा रामायण पार्टः २ को छायांकन सुरु गर्दैछन् । यो बिचमा भने अहिले रणवीर आफ्नो सञ्जय लिला भन्सालीको आगामी फिल्म ‘लभ एन्ड वार’ को सुटिङमा व्यस्त रहेका छन् । जसमा उनको चरित्र बिल्कुलै फरक छ ।
तर, यसपछि उनले रामायण भागः२ को तयारी पनि गर्नुपर्ने पनि छ, जसको लागि उनले छिट्टै लुक टेस्ट गर्न लागेका छन् कि उनी आफ्नो चरित्रमा फिट छन् कि छैनन् भनेर हेर्नु पर्ने हुन्छ ।
रामायणको पहिलो भागमा भगवान राम र माता सीताको प्रारम्भिक जीवनको बारेमा देखाइने छ भने दोस्रो भागमा सीताको वनवास र अपहरणको वरिपरि घुम्ने जनाइएको छ । सीताको भूमिका निभाएकी साई पल्लवी यतिबेला आफ्नो सबैभन्दा ठूलो दृश्यको तयारीमा छिन् । युनिटले लंकाको हरियाली बगैंचा अशोक वाटिका, जहाँ सीतालाई कैद गरिएको थियो, मा महत्वपूर्ण दृश्यको तयारी थालेको छ । यो अवस्थाका लागि दुईवटा गीत पनि तयार भइसकेको छ ।
रामायणको सेट मुम्बईमा मात्र बनाइएको छ । मनसुन अगावै दृश्य पूरा गर्ने प्रयास भइरहेको छ । निर्देशकले अक्टोबर २ सम्ममा यो पार्ट पूरा गर्ने योजना बनाएको भारतीय सञ्चारमाध्यमले उल्लेख गरेका छन् ।
