काठमाडौं । भारतको बोर्डर सेक्युरिटी फोर्स (बीएसएफ)का एक जवानलाई पाकिस्तानी रेन्जर्सले आफ्नो नियन्त्रणमा लिएका छन् । पाकिस्तानको नियन्त्रणमा जवान पूर्णम कुमार साओका बुबा भोलानाथ साओले आफ्नो छोराको सुरक्षित फिर्ती सुनिश्चित गर्न केन्द्र सरकारलाई अपील गरेका छन्।
यद्यपि, यस सम्बन्धमा सरकारबाट अहिलेसम्म कुनै आधिकारिक जानकारी प्राप्त भएको छैन। पूर्णमकी श्रीमती रजनीले पनि आफ्नो पतिको सुरक्षित र तत्काल फिर्तीको लागि केन्द्र र राज्य सरकारलाई अपील गरेकी छिन्।
पश्चिम बंगालको हुगली जिल्लाको रिश्रामा बस्ने पूर्णमको परिवारलाई उनका एक साथीले फोनबाट घटनाको बारेमा जानकारी गराएका थिए । बुबा भोलानाथ साओका अनुसार पूर्णम गत महिना बिदामा घर आएका थिए र मार्च ३१ मा पठानकोट फर्किएका थिए।
श्रीमती रजनीका अनुसार पहलगाम घटनापछि उनले आफ्नो श्रीमानसँग फोनमा कुरा गरेकी थिइन्। गत बुधबार राति उनका श्रीमानका एक साथीले उनलाई फोनमा पूर्णम पाकिस्तानी रेन्जर्सको हिरासतमा रहेको जानकारी गराए ।
उनका अनुसार पूर्णम गत महिना प्रयागराजमा आयोजित कुम्भको समयमा पनि ड्युटीमा थिए।
पूर्णमका बुबाले भने, “बुधबार फोन गरिएको थियो तर कुनै प्रतिक्रिया आएन। त्यसपछि राति हामीले उनी पाकिस्तानको हिरासतमा रहेको जानकारी पायौं। बीएसएफका एक वरिष्ठ अधिकारीसँग पनि फोनमा कुरा गरियो।”
परिवारका सदस्यहरूलाई अहिले पूर्णमलाई कहाँ राखिएको छ भन्ने थाहा छैन।
केन्द्रीय मन्त्री तथा राज्य भाजपा अध्यक्ष सुकान्त मजुमदारले आफ्नो सामाजिक सञ्जाल प्लेटफर्म एक्स अकाउन्टमा लेखेका छन् , “यस बुधबार, हुगलीको रिश्राका एक बहादुर बीएसएफ जवान पीके साओलाई पाकिस्तानी रेन्जर्सले हिरासतमा लिएको छ। आज मैले उनको परिवारसँग कुरा गरें र उनीहरूलाई आश्वासन दिएँ कि उनीहरू एक्लो छैनन्। भारत सरकार उनीहरूसँगै दृढतापूर्वक उभिएको छ।”
“केन्द्रीय सरकारले यस सैनिकलाई उनको मातृभूमिमा फिर्ता ल्याउन कूटनीतिक र प्रशासनिक दुवै तरिकाले हरसम्भव प्रयास गरिरहेको छ।”
