सुडानको दारफुर क्षेत्रबाट भारतीय नागरिक अदर्श बेहरालाई त्यहाँको अर्धसैनिक समूह र्यापिड सपोर्ट फोर्सेस (RSF) ले अपहरण गरेको पुष्टि भएको छ। भारतको ओडिशा राज्यको जगतसिंहपुर जिल्लाका ३६ वर्षीय बेहरा सन् २०२२ देखि सुडानको सुकराटी प्लास्टिक फ्याक्ट्री मा कार्यरत थिए।
भारतीय समाचार च्यानल NDTV ले प्राप्त गरेको भिडियोमा बेहरालाई दुई जना RSF सैनिकबीच बसिरहेको देखिन्छ। भिडियोमा तीमध्ये एक सैनिकले अंग्रेजीमा सोधेको सुनिन्छ – “Do you know Shah Rukh Khan?” (तिमीलाई शाहरुख खान थाहा छ?)। अर्को सैनिकले उनलाई “Dagalo good” भन्न आग्रह गर्छ, जसले RSF का कमाण्डर मोहम्मद हमदान दागालो (हेमेती) लाई जनाउँछ।
NDTV का अनुसार बेहरालाई सुडानको उत्तरी दारफुरको राजधानी एल फाशिर बाट अपहरण गरी दक्षिणी दारफुरको राजधानी न्याला लगिएको अनुमान गरिएको छ, जुन RSF को मुख्य गढ मानिन्छ।
बेहराले आफ्नो परिवारलाई पठाएको अर्को भिडियोमा उनले हात जोडेर सहयोगको याचना गरेका छन्। उनले भनेका छन्, “म यहाँ एल फाशिरमा छु जहाँ अवस्था धेरै खराब छ। म दुई वर्षदेखि कठिन अवस्थामै यहाँ बस्दै आएको छु। मेरो परिवार र बच्चाहरू धेरै चिन्तित छन्। कृपया मलाई बचाइदिनुहोस्।”
उनकी पत्नी सुस्मिता बेहरा ले NDTV सँग कुरा गर्दै भनिन्, “उनीले केही समयअघि अवस्था बिग्रिँदै गएको बताएका थिए, तर यस्तो अपहरण हुने हामीले सोचेकै थिएनौं।” उनीहरूले भारतको परराष्ट्र मन्त्रालय र ओडिशा सरकारसँग तत्काल हस्तक्षेपको आग्रह गरेका छन्।
सुडानका भारतस्थित राजदूत डॉ. मोहम्मद अब्दल्ला अली एलटोम ले NDTV लाई भने, “दारफुर क्षेत्र अत्यन्त अस्थिर छ र एल फाशिरमा पूर्ण संचार अवरोध भएको छ। अहिले त्यहाँ कसैले कसैलाई सम्पर्क गर्न सक्दैन। हामी बेहराको सुरक्षाका लागि प्रयासरत छौं र उनी सकुशल फर्किने आशा राख्छौं।”
सुडानमा गत वर्षदेखि RSF र सरकारी सेना सुडानिज आर्म्ड फोर्सेस (SAF) बीचको सशस्त्र द्वन्द्वले देशलाई गम्भीर मानवीय सङ्कटमा पारेको छ। सन् २०२३ को अप्रिलदेखि सुरू भएको यो युद्धमा हालसम्म १ करोड ३० लाखभन्दा बढी मानिस विस्थापित भएका छन् र लाखौं नागरिक भोकमरीको चपेटामा परेका छन्।
अपहरण भएको एल फाशिर क्षेत्रमा अहिले पनि तीव्र युद्ध भइरहेको छ र अन्तर्राष्ट्रिय सहायता संस्थाहरूले त्यहाँ मानवीय सहायता पुर्याउन कठिन बताउँदै आएका छन्।
