काठमाडौँ । जाडो मौसममा कपालको स्वास्थ्यमा पानीको तापक्रमले निकै महत्त्वपूर्ण भूमिका खेल्छ। यदि गलत तापक्रमको पानीले कपाल धोएमा कपाल रुखो हुने, टाउको चिलाउने र समयसँगै कपाल झर्ने समस्या बढ्न सक्छ। त्यसैले तातो, चिसो र मनतातो पानीले कपाल र टाउकोको छाला (स्क्याल्प) मा कस्तो असर गर्छ भन्ने बुझ्न जरुरी छ।
धेरैजसो मानिसको मनमा जाडोमा कपाल तातो पानीले धुने कि चिसोले भन्ने दुविधा हुन्छ। यसको सही जवाफ सन्तुलनमा लुकेको छ। तातो पानीले कपाल धुँदा कपालको माथिल्लो तह खुलेर फोहोर र अतिरिक्त तेल सफा गर्न मद्दत पुग्छ। यो विशेषगरी चिल्लो कपाल हुनेहरूका लागि फाइदाजनक हुन सक्छ। तर, धेरै तातो पानीको बारम्बार प्रयोगले टाउकोको प्राकृतिक तेल नष्ट गरिदिन्छ। जसले गर्दा कपाल रुखो हुन्छ र टुक्रिने वा झर्ने समस्या बढ्न सक्छ।
अर्कोतर्फ चिसो पानीले कपालको क्युटिकल्सलाई बन्द गर्छ, जसले गर्दा कपालमा ओसिलोपन वा ‘मोइस्चर’ कायम रहन्छ। यसले कपाललाई नरम, चम्किलो र कम ‘फ्रिजी’ देखाउन मद्दत गर्छ।
विशेषगरी सुक्खा र बिग्रिएको कपालका लागि चिसो पानी फाइदाजनक मानिन्छ। साथै, चिसो पानीले टाउकोमा रक्तसञ्चार बढाउन मद्दत गर्छ, जुन कपालको वृद्धिका लागि राम्रो मानिन्छ।
संवेदनशील छाला भएकाहरूले धेरै तातो पानीबाट बच्नुपर्छ। यसले जलन, चिलाउने र एक्जिमाजस्ता समस्या निम्त्याउन सक्छ। चिसो वा सामान्य पानीले टाउकोलाई आराम दिन्छ ।
कपाल धुनका लागि मनतातो पानी सबैभन्दा उत्तम विकल्प हो। मनतातो पानीले कपालको ओसिलोपन नहटाई सफा गर्छ। चाहने हो भने अन्तिममा चिसो वा सामान्य पानीले पखाल्न सकिन्छ।
सही तापक्रमको पानी प्रयोग गरेर कपाललाई लामो समयसम्म स्वस्थ, मुलायम र बलियो राख्न सकिन्छ।
